Vawiin khan World No Tobacco Day pualin Anti Tobacco Squad leh District Level Task Force te chuan Joint Drive an nei a. Mamit khawpui chhunga Dawr hrang hranga Section 7 COTPA Act zawm lote vaiin an thawkchhuak. 

He Drive neihnaah hian Group A leh B a inthenin Mamit khawpui chhung fan chhuah vek a ni a. Mamit Venghlunah Programme tawi hman niin dan ang lova zawrh an thil mante tihralna an nei nghal bawk. 

Pi Lalbiaksangi District Bawrhsap chuan Mizoram chu Cancer vei tamna ber ram kan ni chu Vaihlo leh a kaihhnawih hnathawh ni ngeia lang a ni a, chuvangin zuk leh hmuamah kan insum a pawimawh a ni a ti a. A zuar thinte pawh dan ang thlapa zuar turin a chah. 

CMO, Mamit pawhin Vaihlo leh a kaihhnawihin hriselna a khawih pawi theihzia leh tul lova sum senna mai a nih bakah chhungkaw nun thlenga a nghawng pawi theihzia a sawi bawk. 

Kumin World No Tobacco Day-ah hian "Zuk leh hmuam hmasawnna tithuanawptu" tih thupuia hman a ni a. Mamit khawpui chhungah dan ang lova zawrh vaihlo leh a kaihhnawih chi hrang hrang, Tuibur litre 1, Sahdah pack 131, Vaihlozial 184, Foreign Cigarettes bawm 224 leh tlawn 21 te man a ni. 

Vawiin Joint Drive neihnaah hian Addl.DC, Addl.SP, DIPRO, SDEO, DEO, DTO, DMS, Adjutant 4th IR, DPC (SSA), Nursing Superintendent H&FW, Pharmacist H&FW, Principal, GMC Mamit bakah NTCP Official te, tlawmngaipawl hruaitute leh khawtlang hruaitute bakah thuthar thehdarhtute an tel a ni.