Khawvel hmun dangte rualin vawiin khan Mizoram hmun hrang hrangah zuk leh hmuam dona ni “World No Tobacco Day” hman a ni a. Information & Public Relations (I&PR) Department chuan an Department Conference Hall, Aizawlah Director Pi Lalnithangi kaihhruaiin he hun hi an hmang a ni. 

I&PR Director Pi Lalnithangi chuan World No Tobacco Day hi mihring hriselna nasa taka khawih chhetu vaihlo zuk, ei leh hmuam thatlohzia hriaa, ching dawklak tawh ten nghei tur leh a la ching ve ngailo ten ti chhin lo tura rilru an siamfelna ni nise a duh thu a sawi a. Cancer leh natna khirh tak tak thlentu anih avangin sawrkar laipui pawhin zuk leh hmuam dona dan The Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) Act, 2003, COTPA dan tiha hriatlar chu a siam a ni, tiin I&PR Department a thawktute he dan hi zawm tur leh a ti thin ten sim turin a fuih a ni. 

Khawvel puma vaihlo dona ni World No Tobacco Day hi kum 1987 khan  World Health Organization (WHO) chuan kum tin May 31a hman thin turin a lo duang tawh a. Kuminah he ni puala WHO thuchhuakin a tarlan danin khawvel pumah vaihlo hman avangin kum tin mi maktaduai 7 vel thi thin ang an ni a, kum khat chhungin vaihlo leina man leh vaihlo tih thinin a hrin natna hrang hrang enkawlna atana sawrkar leh chhungkua ten sum an senso belhkhawm chu  US$ 1.4 trillion a tling niin WHO chuan an chhut a. Kum 2030 ah chuan ram thang mek developing countries-ah mihring za zela 80 thihna thlentu chu vaihlo a ni dawn, niin an sawi. 

Kumin World No Tobacco Day thupui chu ‘Tobacco -A threat to development’ (vaihlo zuk, hmuam leh ei hi hmasawnna tithuanawptu) tih a ni a. Mizoramah he ni hi Indian Society on Tobacco & Health, Mizoram Chapter, ISTH (M) huaihawtin an President Pi Lal Riliani hovin May 31, 1989 khan Vanapa Hall, Aizawlah an lo hmang tan tawh a. He ni pual hian vaihlovin mihring taksa a khawih chhiat nasat zia leh ti lo tura inzirtirna hun an hmang thin a ni.