Vawiin khan Mizoram Journalist Association (MJA) member-te tan New Economic Development Policy (NEDP) chungchang inhrilhfiahna leh sawihona ni khat awh workshop buatsaih a ni a. He hun, I&PR Auditorium a neih hi Minister of Finance, Planning & Programme Implementation, etc. Pu Lalsawta chuan hawngin a hmanpui a, Pu. H. Liansailova, Mizoram State Planning Board Vice-Chairman chu khualzahawm a ni. He hunah hian thuthar lakhawmtute bakah NEDP kaihhnawih Sorkar department hrang hrang hotute an tel a ni. 

Minister Pu Lalsawta chuan NEDP chu “Comprehensive Growth Strategy for Mizoram” tih a nih angin Sector tin khawihin, Sorkar department hrang hrang heng - Health, Education, Industry, Water Supply, Roads, Power; Sports, Agriculture, Horticulture, Animal Husbandry & Veterinary, Fishery leh a dangte telh an nih thu leh, he policy hian a tir atanga dah pawimawh bik nei hran lovin, hmasawnna rualkhai tak a awm theih nan a tul dan ang zelin Sorkar chuan Priority neiin hma lak zel a nih tur thu a sawi a. Policy Agenda pawimawh tak tak - Administrative Reform, Land Reform, Climate Change, Power Sector Reform, Skill Development, Reform in Public Financial Management, Aizawl City Traffic Jam harsatna sutkian te he policy hnuaiah hian a tel vek thu a tarlang bawk. Minister chuan NEDP chu sum leh therhlo hmanga mimal tanpuina a nih loh thu leh, kawng hrang hranga chak zawka hmasawnna siam rah tlana huapzau zawka mipui hamthatna tur siamna lam a nih thu sawiin, ‘tang tanpuina’ a ni, a ti a. Loneih leh ranvulh kawngah hmanlai hun atanga ngheilo nei ngah heklo, mahni inchawmzo tawk tawk dinhmun atangin sum tam zawk siam a, hausakna kawng zawh (Market Economy) luhchilh hi kan tum ber a ni a, hei vang hian Mizoramah hian “Economic Exodus from Subsistence Level” neih kan tum a ni, Minister Pu Lalsawta chuan a ti a ni. 

Finance Minister chuan he dinhmun (subsistence level) atanga tal chhuak a, thar chhuah leh ranvulh lo pung te hmanga Company-te din a, Mizoram leh ram pawna hralh chhuah a, heng thil thar te hi Market Economy-a luhpui tumin Sorkar chuan ruahmanna hrang hrang a siam thu a sawi a. Chung zingah chuan thlai/ran luhchilh bik neiin loneitu/ran vulhtute leh Entrepreneur te’n ‘Contract Farming’ hmangin tam zawk thar chhuah an tum tur thu te, a tul dang ang zela Entrepreneur Training buatsaih zel te leh, hemi atan hian Mizoram Entrepreneurship Development Monitoring Committee (MEDMOC) chu din a nih tawh thu te leh Sorkar chuan thar chhuah tamna kawng emaw ran vulh tam theihna kawnga an mamawh intawm, heng - Link Roads, technical, technological assistance leh an thar chhuah lo tam ta sawngbawlna tur khawl (machines) leh dahkhawlna (Godowns/Market Yards/Cold Storages) leh Company nena insuihzawmna kawng (Market Linkage)-ah a tul dan ang zela Sorkar chuan puiin remchanna a buatsaih tur thu Minister chuan a sawi a. Mimal leh Pawl tana man to leh neih harsa hi Sorkarin a bitum ang a, Employment tihpun theihna ni nghal bawk turin mimal emaw Pawl emaw hnenah man tilawm tea hmantir (Outsource) zel hi Sorkar tum dan a nih thu leh, Sorkar hian hnathawktu te mamawh intawm a buatsaihsak ang a, mipuiin an dinchhuahpui ve thung ang, a ti a ni. Minister Pu Lalsawta chuan Machines/Buildings etc. hman tak loh neih ang ang te a rang lama zawn chhuah a, hman theiha thuam that vek tum bawk a nih tur thu te a tarlang bawk. 

Mizoram State Planning Board Vice-Chairman Pu H. Liansailova chuan NEDP hlawhtling tur chuan kalphung leh ngaihdanah thui tak tih danglam a tul dawn avangin sorkar department hrang hrang thawktuten thawhhona tha an neih leh, mipui tawiawmna a pawimawh thu a sawi a. Chumi atan chuan thudik leh thil nih dan phung mipuiin an hraitthiam a an hriatchian theih nan journalist te pawimawh thu a sawi a; tu pawhin an thu saiw emaw an thu hriat te chu belhchian dawl, innghahna tha tak nei a nih leh nih loh finfiah hmasak phawt a finthlak thu a sawi bawk. Mizoram  economy hmasawnna chungchang sawi telin, duhthawhna tur tam tak la awm mahse Mizoram dinhmun chu chhia a sawi tur a nih loh thu te, GSDP Debt Ratio pawhin a kum tela ziaawm lam a pan chhoh zel thu te a tarlang a ni. 

Vawiin NEDP Workshop buatsaih hi Dr. Vanlalramsanga, Secretary, Planning and Prog. Implementation chuan a kaihruai a. Pu Vanlalrema Vantawl, MJA President chu thu sawi bawkin, sorkar hmalakna mipui hmnelhriattir kawnga thuthar lakhawmtute mawhphurhna te sawiin, mipui leh sorkar tana thawk palai annih thu a tarlang a ni. Workshopah hian NEDP hmalakna lo awm thawhte leh hmathlir chungchangah sawihona tha tak neih a ni. 

Vawiin hian NEDP chungchang Open Essay Competition buatsaih a titha thlanchhuah pangate hnenah lawmpuina Citation pek nghal niin, an zinga top three-te hnenah pawisafai (1-na Rs. 50,000; 2-na Rs. 30,000, 3-na Rs. 10,000) pek a ni a. Lawmman dawngtute hi Dr. Lalzahawma, NIFM; Jerry Zoremsanga, Mission Veng, Aizawl; C. Lalengkima, Champhai; Lalhmingmawia, MZU leh R. Lalfakzuala, Chaltlang, Aizawl te an ni.