No.7867/2020-2021

Mamit 22nd March, 2021 : Vawiin khan I&PR Conference Hall, Mamit-ah Mamit WATSAN Division, PHED buatsaihin World Water Day hman a ni a. Dr. Lalrozama, IAS, District Bawrhsap chuan khuallian niin he hun hi a hmanpui.

Khuallian chuan World Water Day hmang tura kalkhawm mipuite chibai bukin mihringte nunna tura thil pawimawh berte zing ami tui hlut nachang hre thar turin kalkhawmte a sawm. 

Dr. Lalrozama chuan World Water Day thupui "Valuing Water" tih chu sawifiahin thil reng rengin ngaihhlut a hlawh nachhan chu a pawimawh em vang leh a tlem em vang anih thu sawiin tui pawh a tlem mai piahlamah a pawimawh em avangin ngaihhlut a ngai a ni a ti. Khawvela tui awm zawng zawng 2% chiah hi tui tihthianghlim chawp ngai lova hman nghal mai theih anih avangin kan renchem a tul hle a, tui Disaster awm thei tur hi mitinin vei tak taka kan vei a, ralpui phiara kan phiar a tul hle a ni a ti bawk.

Mamit-a World Water Day hmanna-ah hian Pu Vanlalchhuanga Chhangte, President, Sub. Hqrs YMA, Mamit, Pi Laltharzeli, National Awardee, Swachh Mahotsav, Pu Zatluanga Sailo, Leader, ISA, JJM te pawhin thu an sawi bawk.

He hunah hian Er. V. Laldanmawia, SDO, PHED, Mamit chuan power point presentation hmangin World Water Day hman tan anih dan, tui pawimawhna bakah PHE Mamit hmalakna hrang hrangte tarlangin mipuite hrilhhriatna leh zirtirna a nei a. Khawtin VC-te inelna atana buatsaih State Level Essay inziahsiak lawmman semna neih nghal a ni a. Hei bakah hian Catch the Rain tih thupui hmanga NYK Mamit-te buatsaih Essay inziahsiak lawmman sem nghal a ni bawk.

World Water Day hmanna hun hi Er. Lalzawmliana, Sr. EE, PHED Mamit chuan kaihruaiin Pi Lalrinmawii Pachuau, JE, PHED Mamit chuan tui renchem tura kalkhawmte intiamna a kaihruai a. Pu Lalremruata, DHA, PHED Mamit chuan lawmthu sawina a nei a ni.

He hunah hian District chhung khaw hrang hranga WATSAN Committee aiawh te, Mamit khawpui chhunga Heads of Department thenkhat, khawtlang hruaitute leh tlawmngai pawl aiawhte an tel a ni.

Attachment

  • Loading attachment...