No.7866/2020-2021

Dated Champhai, the 22nd March, 2021: Khawvel hmun dangte rualin vawiin khan I&PR Auditorium Champhaiah tui pawimawhna leh humhalh a tul zia inzirtirna ‘World Water Day 2021’ lawmna hun chu PHE Department bultumin hman a ni. He hunah hian Pi Maria C.T. Zuali, District Bawrhsap chu khuallian a ni a, online hmanga tui bill pek theihna a tlangzarh nghal a ni. Thupui atan 'Tui ngaihhlut/Valuing Water’ tih chu hman a ni.

Khuallian Pi Maria C.T. Zuali chuan kum tinin Mizoramah tuihnain kiam lam a pan zel thu sawiin, "Ram ngaw kan thiah avangte leh tuihna kan humhalh that loh vang a ni", a ti a. Kan mamawh hrang hrang leina atana pawisa sen kan hreh loh laiin nitina kan mamawh, a tel lova kan awm theih loh tui dahkhawlna lei tum lo kan tam lutuk hi kan inher rem a ngai a, kan ngaihhlut zawng kan thlak a ngai a ni, a ti a. Tui hna ti tam thei tura theihtawpa tan lak a tul thu sawiin, a theihna kawng hrang hranga tui luangral tur venga a taka kan chet chhuah  a ngai tawh a ni, a ti bawk.

Tui thianghlim pawimawh zia sawiin, "Pathian min siam danah kan taksain a mawmawh tawk tui  thianghlim kan hmuh loh chuan kan taksa bung hrang hrang te'n an nih tur ang an ni thei lo a ni", a ti a. Kan tui tlan hnar hrang hranga bawlhhlawh tam lutukte chu  ngaihmawhawm a tih thu pawh sawiin, khawtlangin kan vei a, puanven sawichhinga a tihfai lama tan lak a tul thu a sawi bawk. Bawrhsap chuan "Tui atanga natna kan kai theih hrang hrang laka kan him theihna turin PHED in damdawi hmanga sawngbawlin kan inah min rawn thlensak thlap a, kan lirthei leh kan pangpar tui pekna tur a ni lo tih kan hriat reng a ngai a ni, a ti a. Kan tui dawn ang angte renchem taka hman hi mipuite mawhphurhna a ni tih kan inzirtir uar a ngai hle a ni, a ti bawk.

He hun hi Champhai PHED WATSAN Circle S.E Er. C.Lalhmachhuana chuan kaihruaiin, Er. J.Kapkima, E.E, PHED Champhai chuan  kalkhawmte lawmna leh thupui sawizauna hun a hmang a, a kaihhruaina hnuaiah World Water Day pualin tui humhalhna beihpui thutiam lak a ni.

Tuihna humhalh leh vawnhim kawnga inzirtirnate neih chhunzawm a ni a. Pu Lalventluanga, Asst. Professor, Dept. of Botany, Govt. Champhai College hnen atangin thupui thlan ‘Valuing Water’ tih hmanga zirtirna ngaihthlak a ni a, Sub-Hqtrs. YMA Champhai aiawhin President Pu F.Lalrinmuana'n  'Tui hna humhalh' tih thupui a sawifiah bawk a ni. 

He hunah hian World Water Day puala Essay inziahsiak lawmmante semchhuah a ni a. Pi Julie C.Mawii, District Coordinator, SBM-G & JJM, Champhai District chuan lawmthu sawiin he hun hi a khar a ni. Vawiin World Water Day lawmna hunah hian YMA hotute, Zirlai leh PHE Dept thawktute an tel a ni.

United Nations Conference on Environment and Development chuan kum 1993, March ni 22 khan World Water Day a lo hmang tana, hemi kum atang hian World Water Day hi thupui thlanbik neiin kumtin khawvel hmun hrang hrangah hman thin a ni.