No.7865/2020-2021

Lawngtlai, Vau thla ni 22, 2021: Vawiin kha khawvel pum huapa tui ngaihhlut inzirtir ni, "World Water Day 2021" a ni a. Lawngtlaiah chuan Public Health Engineering Department (PHED), Lawngtlai Division buatsaihin DC Conference Hall-ah hman a ni a, Lai Autonomous District Council (LADC)-a Chief Executive Member (CEM) Pu Manghmung Chinzah chu Khuallian a ni.

Pu Manghmung Chinzah chuan ramngaw kan tihchereu nasat avangin tuihna a tlemin, tui a harsa zel tih a sawi a. A tel lova kan nun theih loh avangin tui chu kan ngaihhlut a, kan renchem a, tuihna humhalh leh ramngaw siam kawngah theih tawp chhuaha tan kan lak a tul a ni, a ti a. Tu leh fate tana ram nuam zawk siam turin tuna leilung luahtute hi kan pawimawh a, keimahni hma hun ngei pawh kan kutah a innghat a ni, a ti.

Lawngtlaia World Water Day puala hun hman hi PHED Lawngtlai Division-a Sr Executive Engineer Er Netralal Jaisi chuan a kaihruai a. Sub-Divisional Officer Er T. Mangliandinga'n tui pawimawhna, humhalh a tulzia leh hma lak dan turte powerpoint presentation hmanga a lem nen entirin, a sawifiah a. Central Young Lai Association (CYLA) President Pu HC Vanlalruatpuia pawhin thu sawiin, Swachh Bharat Mission (Grameen) District Coordinator Pu Benjamin Lalrinzuala kaihhruaiin kal khawmte'n tui humhalh leh renchem tura intiamna (water pledge) an sawi rual bawk.

Vawiina hun hmanah hian sawrkar office hrang hrang hotute leh tlawmngai pawl hrang hrang hruaitute an tel a ni.

World Water Day hi United Nations (UN) bul tumin kum 1993 atang khan khawvel pumah kum tin March ni 22-ah hman thin a ni a. Tui pawimawhna leh hlutna te, humhalh leh renchem a tulzia te au chhuahpuina leh inzirtirna ni atan hman thin a ni a. Kum tin thupui thlan bik awmin, kumin 2021 hian thupui atan, "Tui Ngaihhlut" (Valuing Water) tih hman a ni.