Vawiin khan District Child Protection Unit (DCPU) leh Mamit Officer’s Club tangkawpte chuan Children’s Week kharna atan Youth Empowerment Programme (YEP) hman a ni a. Er H. Lalzirliana 3-Mamit Bialtu MLA chuan khuallian niin a hmanpui.

Khuallian bialtu MLA Er.H.Lalzirliana chuan hetiang hun hmang theia a awm chu lawmawm a tih thu a sawi a. Mamit-a zirlaite chu khawpui danga zirlaite aia an hniam bik loh thu sawiin Mamit District chhungah pawh mi tam takin hlawhtlinna an nei tawh a ni a ti. Theihloh tih thumal thaichhia a, thinlung huaisen, harsatna mahni a hneh thin te'n hlawhtlinna an chang thin a.Taimakna leh tumruhna nen, chhel taka lehkha zira an hma hun thlir chung zela ke pen theuh turin zirlaite a fuih a ni.

Bialtu MLA hian zirlai naupangte chu School leh khawlai nunah khawi group ah nge an awm tih chu an mahni in enfiah fo a, lehkhazir tha peihlo leh hlawhtlin tum tlat tute chu zirlai kan nih atangin group hran te te ah kan in then thin a. Zirlai naupangte chu an awmna group thlang dika fimkhur turin a chah bawk a ni.

Dr R.Lalrinhlua DCPO pawhin kalkhawmte lawmna thusawiin Youth Empowerment Programme (YEP) hman anih chhan leh Mamit-a zirlaite chuan an hmalam hun atan tum mumal leh hlawhtling tura ke an pen theihnana fuihna hun siamsak a tul avanga he hun hi ruahman a nih thu a sawi. He huna kalkhawm zirlai naupangte chu hlawk taka hun an hman theih nan duhsakna a hlan nghal bawk a ni.

Pi Gracy L. Bawitlung, CJM Secretary DLSA pawhin naupangte fuihna thu tak a sawi bawk.

Youth Empowerment Programme-ah hian Pi Lalhmachhuani Sailo, Protection Officer (NIC) DCPU chu Moderator niin zirlaite tana chona leh fuihna petu tur Mizo fate zinga mi hlawhtling tak tak pathum(3) te kawmna hun a nei a. Pu David Zohmangaiha, Everester, Tv.NT Lalbiakkima, Boxer leh Dr.Joseph Lalremruata, Asst. Professor Govt. Mamit College te chuan zirlaite tana hmasawnna tur tangkai tak tak anmahni nuna an tawn kaltlangin an sawi. He hunah hian Dr.Rebecca Lalnuntluangi, Post Doctoral Researcher, TATA Institute of Fundamental Research Mumbai leh Dr Krista Roluahpuia, Post Doctoral Research Scientist, IIT Mumbai te chuan video in zirlaite fuihna thu tha tak tak an thawn bawk a ni.

District Level Child Welfare te'n Women Empowerment In Mizoram tih thupui hmanga Children Day denchhena Mamit High School paruk te tana Essay Writting Competition an buatsaih lawmman semna neih nghal a ni bawk.

He hun hmang tur hian Mamit khaw chhunga High School leh Higher Secondary School zirlai naupang mi 400 chuang an tel a ni.