A ni hnihna leh a kharna ni turin vawiin khan AR Ground-ah Pawl Kut lawm a ni a. Deputy Chief Minister Pu Tawnluia chu Kut Pa niin Social Welfare and Tribal Affairs Minister Dr K.Beichhua chu Kut Thlengtu a ni. Pawl Kut ni hnih ni ah hian MLA pathum - Veterinary and Fishery Board Vice Chairman Pu C.Lalmuanpuia, Bamboo Link Road Board Vice Chairman Pu Ramthanmawia leh Pu Andrew H.Thangliana bakah Social Rehabilitation Board Vice Chairman Pu K.Liantlinga te pawh an tel a ni.

Pu Tawnluia chuan Mizo pi leh puten  Pawl Kut an hman thin dan sawiin a tirah chuan ‘Naupang Pual Kut’ tih thin a nih dan leh hun engemawti hnuah khawtlang kut anga hman chhunzawm a nih tak thu a sawi a. Lo neiha eizawng an nih avangin kum tluana rim taka an thawh rah buh tharte an seng a, lal leh khawnbawl upaten kut hman ni tur an ruat fel a, chhungtinten kut hmang turin nasa takin an inbuatsaih thin a ni,  a ti. Deputy Chief Minister chuan hlim leh lawm taka hun hmang turin Kut chhimtute duhsakna a hlan a, Mizo culture vawnhimna pawimawh tak a nih ngei a beisei thu a sawi bawk.

Kut thlengtu Dr K. Beichhua chuan Pawl Kut rei tak hman a nih tawhloh hnuah pi leh pute hunlaia kut ropui thangtharten an theihnghilh loh nan leh culture tihnunna a nih hriain kum kalta atang khan Sawrkar chuan Pawl Kut lawmna a buatsaih leh ta a, hman chhunzawm zel pawh a tum a ni, a ti. He Kut hi naupang pual bika buatsaih a nih angin a thupui pawh ‘Nu leh pa thuawih’ tih a ni, tiin Minister chuan kalkhawm zawng zawngte hlim tak leh rilru thianghlim taka hun hmang turin a sawm a ni.

Mizo naupang pathum chawimawi phute hnenah vawiin Pawl Kut lawmna programme-ah hian chawimawina hlan a ni a. Chawimawina dawngtute chu F. Vanlalhriatrenga, kum 13, Sairang Dinthar, thian chhan thih ngama tui tla chhanchhuaktu te; infiamna lama Mizote tihmingthatu - Jeho Himnakulhpuingheta, kum 16, Lunglei,Table Tennis thiam leh Zonunsangi, kum 17, Tuirial khua, Judo thiam te an ni.

Pawl Kut hi Ministry of Tribal Affairs, Government of India leh Mizoram Sawrkara Social Welfare and Tribal Affairs Department leh Art and Culutre Department te tangkawp buatsaih a ni a. Mizo hnam lam leh zai, Mizo infiamna, hnam ziarang pholang thei tur painting exhibition, photo exhibition, handloom exhibition te thlir tur leh ngaihthlak tur a awm bakah eitur chi hrang hrang tuihnai tak tak buatsaih a ni. Pawl Kut denchhenin lemziak leh thlalak intihsiak, Mizo indigenous games, pi pu zai leh hnam lam intihsiak buatsaih a ni bawk.