Vawiin khan DC Conference Hall, Mamit-ah Mrs. Soso Shaiza, Member, National Commission for Women i/c Northeast Region hovin hmeichhiate dinhmun chawikanna tur Schemes hrang hrang, Mamit District chhunga kalpui anih dan thlirin thutkhawm a ni a. Pi Lallawmchhungi, Chairman, Prof. Lalneihzovi Member, Mizoram State Commission for Women te'n Mrs. Soso Shaiza hi an tawiawm a ni.

Meeting-ah hian Mrs. Soso Shaiza chuan hmeichhiate dinhmun chawikanna Schemes NITI AAYOG-in a thlurbing bikte chu sawiho anih dawn thu sawiin heng Schemes te hi Mamit Aspirational District-ah anihna ang takin kalpui anih leh nih loh endik tura NITI AAYOG rawn tirh a nih thu a sawi a. Kan ram hmarchhak State-ah hian hmeichhiate chunga hleilenna Case tlem viau anga a lanna chhan hi hmeichhe harsatna tawk an awm loh vang ni lovin kan dikna chanvo kan hriat loh vang leh thuneitute hnena thlen nachang kan hriat loh vang a nih thu a sawi. Chutihrualin hmarchhakah thuamchhawm hleihluak (Dowry) hman a nih ve loh avangin hmeichhiate an vanneih phah a, lawmawm a tih thu a sawi. Mamit District chu Aspirational District 117 zinga thlan kan nih avangin hmeichhiate chawikanna tur ruahmanna emaw District chawikanna hrim hrim ruahmanna kan dil phawt chuan Central Govt. leh Company te'n an CSR hmangin min puih an chak reng thu a sawi a, chuvang chuan a tam thei ang ber dil turin vawiin kalkhawmte a chah a ni.

Vawiin Meeting-a hmeichhe dinhmun chawikanna tur Schemes hrang hrang thlirhote tha thawkhata a hriat thu a sawi rualin a bik takin heng a hnuaia tarlanteah hian tanla a, tha zawka ruahmanna siam turin a chah a ni.

1. Hmeichhe hnathawkte awmna tur Hostel siam
2. Ujjawala Scheme a taka kalpui
3. Women Helpline a taka kalpui
4. District-a hmeichhe Police tihpun
5. Eklavya Model Residential School siam
6. Mipa leh hmeichhia a hrana awm theihna Hostel siam
7. Self Help Group (SHG) te hnena an mamawh ang Loan pek
8. Vocational Training Centre hawn
9. Govt. Mamit College-in Science Stream a neihna tura hmalak
10. Govt. Mamit College Women Hostel-a khum 10 chauh awm tihpun
11. Sex Ratio tih that
12. Hmeichhiate chu chhungkuaah tui mamawh nasa zawk an nih avangin theih ang anga tui connection emaw, ruahtui khawl emaw, tuilak awlsamna siamsak.

Meeting-ah hian Pi Lallawmchhungi leh Prof. Lalneihzovi te pawhin Mizoram State Commission for Women hmalak tawhna te tarlangin hmeichhe harsatna tawkte chu englai pawha an harsatna sutkianpui an inhuam thu an sawi a. Hmeichhe dikna leh chanvo chungchanga dan kan neihte inzirtir turin Mizoram State Commission for Women chu englai pawha sawm theih reng an nih thu an sawi a ni.

Dr. Lalrozama, IAS, DC Mamit chuan vawiina khualtha pathum lokalte chunga lawmthu sawi nan ngaihhruina thilpek a hlan a ni.