Vawiin khan Champhai Bawrhsap Pu S.L Naveen IAS  kaihhruaina hnuaiah  District Task Force for Immunization (DTFI) chu thukhawmin, Intensified Mission Indradhanush (IMI) thawh hnihna kalpui dan tur leh Vaccine pek vanga thil duhawmlo thleng thei laka hmalak dan turte rel a ni.

Bawrhsap chuan Naupang leh Nu naupaite hriselna kawnga rahbi pawimawh hmasa leh pawimawh tak natna laka lo invenlawkna Vaccine-te a bikima hunbi nei thlapa lak a ngaih thu sawiin, vaccine la thei zawng zawngte chu ngaipawimawh turin a chah a. Intensified Mission Indradhanush tluang taka kalpui anih theihna tura thawktu leh line department hrang hrangte intawiawmtawnna fakin, hmabak la awmahte pawh tha taka thawkho zel turin a chah a ni.

Thukhawm chuan Naupang kum hnih hnuai lam leh Nu naupaite hnena natna hri laka invenlawkna vaccine pek beihpui thlak thawhhnihna Intensified Mission Indradhanush 2 chu Champhai District pumpuia kalpui  turin December Ni 2, 2019 hian CMO Conference Hall-ah hawn nise, hemi hnu hian  Undivided Champhai District chhunga Health Sub Centre leh Health Sub-Clinic atangtea  vaccine pek beihpui thlak tan nghal nise a ti a. Ruahman dan chuan vaccine pek beihpui hi thawh li a neih tum niin, December Ni 2, 2019 leh January Ni 6, February Ni 3, March Ni 2, 2020-ah te neih tum a ni a. Vaccine la thei turte dapchhuah mek zel a ni a, vaccine mamawh zat leh tul dangte buaipui niin, tun thla tawp hian vaccine mamawh angte chuan   Champhai a lo thleng hman dawn a ni. Vaccine lak vanga thil duhawmlo thleng thei laka invenna atan Adverse Events Following Immunisation (AEFI) Kid-te pawh vaccine pekchhuahna tur hmun hrang hrangahte dah vek tum anih thu tarlan a ni bawk. District Task Force for Immunization (DTFI) chuan Undivided Champhai district mipuite chu vaccine la tur ten a hun taka an lak vek theihna tur leh hlawhtling taka  kalpui anih theihna turin  hemi lam buaipuitute tha taka tawiawm thin turin a ngen a ni.

District Task Force for Immunization (DTFI) tarlan dan chuan tun dinhmunah Undivided Champhai District-ah Naupang kum hnih hnuai lam  5460 leh Nu naupai 1525 an awm  mek a. Intensified Mission Indradhanush thawhhnihna hmang hian vaccine la ngailo, la chhunzawm theilo emaw, hmaih palhte tan vaccine lak theih ani dawn a. Kumin April atanga September thla chhunga Intensified Mission Indradhanush thawh khatna kalpui takah khan vaccine la thei tura ngaih Naupang   1006 ten vaccine lak tur zawng zawng an la vekin fully immunized an ni a, hei hi la thei tur chhinchhiah zinga za zela 40.9 an ni. Thawhhnihna hmang hian huapzo leh zau zawka vaccine la thei tur zawng zawngte hnenah vaccine bikim pek vek tum a ni.

Intensified Mission Indradhanush hi sawrkar laipui hmalaknaa kalpui niin, Mizoram bikah chuan Champhai, Kolasib, Lawngtlai, Lunglei leh Mamit District-ah te kalpui mek a ni a. Intensified Mission Indradhanush (IMI) hmang hian Naupang kum hnih hnuai lam abik takin kum khat la tlinglote tan Oral Polio Vaccine, Pentavalent Vaccine, Fractional Inactive Polio Vaccine, Bacillus Calmette Guerin Vaccine,  Measles Rubella Vaccine leh Rota Virus Vaccine-te pek niin, Nu naupaite tan Tetanus and Diptheria  Vaccine pek thin a ni bawk.