Vawiin khan Mizoram Survey and Land Record Service Association (MISLARSA) General Body Meeting and Training Cum Workshop Ni Hnih awh tur Directorate of Land Revenue & Settlement Meeting Hall-ah buatsaih a ni a. Land & Revenue Settlement Minister Pu Lalruatkima chu Khuallian niin, Special Secretary Pu R.Lalramnghaka chu Khualzahawm a ni.

Khuallian Pu Lalruatkima chuan Department hotute hmalaknaa MISLARSA General Body Meeting leh Training Cum Workshop buatsaih a ni chu lawmawm a ti a, Department hnathawhna kawngah nasa takin hma a sawn tir ngei a beisei thu a sawi a ni. Khuallian chuan Land Revenue & Settlement Department chu hnathawk nasa ber pawl Department a ni a, chhungkaw tin nghawng thei thil khawih tu Department niin, fimkhur pawh a ngai takzet a ni, a ti a. Dan hrang hrang kaihhruaina hnuaia hna thawh a ngaih a vangin rilru, taksa, thlarau hrisel neih a ngai a, nasa lehzual zawka rilru leh ngaihtuahna pawh pek a ngai a ni, tiin a sawi a. Minister Pu Lalruatkima chuan sawrkarin Land Surveyor te indaihlona chu a hriatpuia, hma pawh lak tum a nih thu a sawi a, hei bakah hian Surveyor te training na tur Institution din tum a nih thu a sawi bawk a ni. Minister chuan thil chhete tihsual avang pawhin mi chhungkua Department in a ti buai thei a ni tih hriat reng a tha a, fimkhur tak leh belhchian dawl taka thawk turin Land Surveyor te chu a sawm bawk a ni. Khuallian Pu Lalruatkima chuan mi Department chinfel ngai tam tak nei ti a miten an hriat chu zahthlak takzet a ni, a ti a, LSC lem leh felfai lo tam ta em em chu manganthlak a tih thu a sawi a, Inda rama State dangte en chuan Land Revenue & Settlement Department chu sum leh pai dinhmun siamtu, thawkchhuaktu leh sawrkar khai ding ber tu a ni a, Mizoramah pawh sawrkar sum leh pai dinhmun siamtu Department leh Scheme/Project tam taka State Matching Share pawh awlsam zawka phuhruk thei tu Department a ni thei a ni, tiin a sawi bawk a ni. Khuallian Pu Lalruatkima chuan Training Cum Workshop chuan thiam tawh sa intuaihriamna bakah hmasawnna thawktute hnenah a thlen theih ngei a beisei thu a sawi bawk a ni.
 
MISLARSA General Body Meeting leh Training Cum Workshop-ah hian member 100 chuang an kalkhawm a. Session Hnih a then a ni a, Hruaitu thlan, Inkaihhruaina Dan ennawn leh thildangte programe ah hian a telh a ni.