Nimin khan Mamit Charkawn-ah zuk leh hmuam that loh zia inzirtirna hun (Anti Tobacco Drive) Anti Tobacco Squad buatsaihin neih a ni a. Hetah hian Pu Zothankhuma IAS, District Bawrhsap, Chairman, Anti Tobacco Squad chuan thu sawiin zuk leh hmuam hian mitinte min nghawng avangin tun hunah pawh hian mi zawng zawng tan hun buatsaih anih thu a sawi a. Zuk leh hmuam that loh zia hriain India sorkar pawhin ram pumpui huamin dan fel tak a siam tawh thu leh chu chu khauh taka kenkawh a tul dawn avangin mitinte hemi lama fihlim turin a chah a. Kan Pathian thuin a tarlan angin taksa hriselna leh thianghlimna kawngah mitinten tan kan lak a tul tak zet a ni a ti. Dan zawmna kawngah pawh mitinte tanla lehzual turin kalkhawmte a chah bawk a ni.

Pi Vanlalzari, District Co-ordinator, Mizoram State Tobacco Control Society pawhin zuk leh hmuam that loh zia leh chumi ina harsatna min thlen dan te chipchiar takin a tarlang a. Mizoram in zuk leh hmuam kahhnawih natna ah a ber  kaina  kan neih tarlangin hrawk bawk, chaw dawt cancer veiah khawvelah 1 na kan niin India ramah mipa leh hmeichhe cancer ah te leh chuap, hrawk leh chaw dawt ah te India ramah 1 na kan nih thu a tarlang bawk a ni. Meizial zuk leh a kaihhnawih ah hian India ramah kum tin mi nuai 8 chuang an thi ziah a ni a ti bawk. Pi Zarteii chuan zuk leh hmuam control-na tur danin a huamte leh a hremna dante bakah dan lekkawhna hmun hmate chipchiar takin kalkhawmte a hrilh bawk.

Zuk leh hmuam dona kawnga tlawmngai pawl hrang hrang YMA, MHIP, MUP te bakah lirthei khalhtute leh dawrkaite pawh mahni mawhphurhna theuh hria a tanlak pui turin a sawm bawk.

He hun hi Pu P. Lalhmingthanga, OC, Anti Tobacco Squad member nibawk in a kaihruai a. MHIP, YMA te leh mipui engemaw zat an tel a ni.

Anti Tobacco Squad te hian nimin khan office hrang hrangte tlawhin zuk leh hmuam that loh zia zirtirna an nei bawk a, vawiin hian school hrang hrangte tlawhin hun an hmang leh a ni.