Vawiin chhun khan Vana Pa Hall-ah khawvel pum huap ruihhlo leh ruihhlo hmanga sumdawnna dona ni "International Day Against Drug Abuse & Illicit Trafficking Day 2010" hman a ni a, Social Welfare Minister Pu P.C.Lalthanliana chuan khuallian niin a hmanpui.
Thusawiin Minister chuan Ruihhlo hi khawvel buaipui "International Day" hial puan hnan ngai a nih avangin hmelma naran a ni mai lo tih a chiang a, he ruihhlo khawvel pum huapa do ngai hi keini ang state tereuhte tan hian do hneh chu thil huphurhawm tak ani a ti a, hetiang anih avang hian ruihhlo kan dona kawngah pawh hlawhchhamna rilru put a awl hle thin a, mimal kan nihna ang te, chhungkua, khawtlang, ram leh hnam kan nihna angte a a zavaia tang tlanga kan do let ngam a tul a ni  a ti bawk.

Minister chuan ruihlo do hneh tur chuan kan thalaite nun tuihalna phuhru turin rilru siam thar a tul zia sawiin nun hlimna kawng zawhna tur dik tak mizo thalaite hi kawhhmuh an ngai a, hruaitu tha leh rintlak an mamawh ani a ti a, Pathian a innghah tak tak ngamna atang chauhva hneh theih anih thusawiin kohhran ho pawh nasa lehzuala tan la thar turin a sawm bawk a ni.

He inkhawmah hian Mizoram Social Defence & Rehabilitation Board (MSD&RB) leh Society for Recovering Addicts (SORA) te buatsaih Ruihhlo vanga OD-te buaipui leh enkawl dan tur 3GP Video format a siam bakah NGO Directory te chu Khuallian hian a tlangzarh nghal bawk a ni.

He inkhawmah hian ruihhlo vanga thite sunna hun hmangin minute khat chhung ngawi renga din a ni a, Pi B.Sairengpuii, Social Welfare Department Secretary, Pu Lalbiakmawia Khiangte, Commissioner, Excise & Narcotics Department leh mipawimawh dang ten thu sawiin, Dr. Eric Zomawia Project Director, MSACS buatsaih Ruihhlovin mihring hriselna a nghawng dan entirna powerpoint presentation chu thlir ho a ni bawk.

International Day Against Drug Abuse & Illicit Trafficking hi UNO hmalaknain kum 1988 atang khan kum tin June ni 26 ah hman thin a ni a, kumin atan chuan remchan zawkna avangin June ni 25-ah Mizoram chuan a hmang a ni. Kumina ruihhlo dona ni thupui chu "Ruihlo ni lovin hriselna ngaihven zawk rawh (Think health - not drugs)" tih a ni a, Mizoram Sawrkar hnuaia Department hrang hrang leh tlawmngai pawl hrang hrang tangrualin Vana Pa Hall-a inkhawm hi an buatsaih a ni.