Mamit Bazar Veng huamchhunga Leikhi chu tunhnai  ruahsur avang hian 3 Ft chuanglaiin a tlak hniam tawh avangin a huamchhunga In 19 chu vawiin dt. 21st September 2010 hian thiah a ni.

Hnatlang hi Bazar Veng Village Council bul tuma huaihawt a ni chungin Mamit khawpui chhung VC zawng zawng te chuan an puiin mi 1000 chuangin an thawk chhuak a ni.
 
Hnatlang te ei leh in bakah a tula hman atan tanpuina Bialtu MLA, Pu John Rotluangliana'n Rs 2000 pein hemi bakah hian DC Mamit-in Rs. 5000, Pu C.Lalthansanga, Mamit Bazar Veng in Rs. 5000, Hmarveng VC, Chhimveng VC leh New Mamit VC ten Rs. 1000 theuh leh DVO, NEREF, DEO leh mimal tlawmngai te atangin tanpuina sum thahnem tak hmuh a ni bawk a ni.
 
Bungrua leh hmanrua te phurhna turin PHE, Police leh Forest Department bakah khawpui chhunga mimal tlawmngai ten Motor an thawh bawk a ni.
 
He hnatlangpuiah hian CMO office Mamit chuan inhliam palh an awm thut atan damdawi thahnem tak hnatlanna hmunah hian an rawn chhawp bawk a ni.
 
He Leikhi hian Bazar veng Presbyterian Biak In hmalam a khawih chhiat nasat avangin a lawilen a rem tawh lova chuvang chuan Biak In hi tih zim tura ruahman a ni bawk.
 
Leikhi huamchhunga awm te leh inthiahsak te hian in luah tur remchangah in vawm lutin thenkhat te chuan chhungte an bel mek bawk a ni.