No.6615/2020-2021

Mamit 20th, November 2020 : Vawiin khan DC Conference Hall, Mamit ah Er.H.Lalzirliana Mamit Bialtu  MLA chuan First Responder Vehicle(FRV) Hero Motocorp Ltd CSR Fund- atanga dawn leh zirlai naupangte hman tur zirna hmanraw hrang hrang a vailiam.

Er.H. Lalzirliana chuan Aspirational District- kan nihna atanga inkhaichhuak turin nasa takin DC Mamit leh a thawhpuite hmalakna chu lawmawm a tih thu a sawi a, Kawng hrang hranga min tanpuitute a bik takin REC Ltd leh Hero Motocorps Ltd te chungah lawmthu a sawi a, Mamit mipuiin heng Company- te inphalna zar an zo tur thu leh nasa taka an tangkaipui tur thute sawi bawkin Company te chungah lawmthu a sawi a ni.

Pu Dharam Pal, Central Prabhari Officer & Addl. Secretary to Govt.of India-pawh in thusawiin Mamit District chuan kawng hrang hrangah hma a sawn mek tih han hmuh hian lawmawm a tihthu a sawi a, Mamit DC -hmalakna leh Department-hrang hrang thawhhona zarah Aspirational District- dangte tana entawn tlak khawp a hmasawnna a awm ngei a beisei thu a sawi a ni. Covid-19 hrileng mek avanga a enkawl lai Mamit District- a tlawh theilo chu pawi a tih thu a sawi bawk a ni.

Pu Srinivas Shroff Nagesha Rao, CEO, REC Ltd, pawhin  thusawiin Aspirational District- pasarih an enkawlte zingah Mamit District- chu kawng hrang hranga hmasawn berte zing ami anni chu a lawmpui takzet thu a sawi a, nasa lehzuala an CSR Fund atanga puih a inhuam thu a sawi bawk. Pu Vijay Sethi, Chief Information Officer, Hero Motocorp Ltd, pawhin thusawiin First Responder Vehicle- pali(4) Medical Department-te hmantur a an pek vawiin a hman theih tura Flag off- a ni chu lawmawm a tihthu a sawi a, tangkai taka hman a nih ngei a beisei thu sawiin Mamit mipuite duhsakna a hlan a ni.

DC Mamit leh REC Ltd tangkawp chuan zirna lam a hma kan sawn chak theihnan nasa takin hma a la mek a, REC Ltd CSR Fund- atangin zirna tihhmasawnnan Rs 8.79 Crore, Mamit District hian a dawn tawh thu tarlan a ni a, District huamchhunga ziak leh chhiar thiamlo te zawnchhuah niin tun dinhmunah ziak leh chhiar thiamlo mi 5520- an awm thu ngaihthlak a ni a, heng ziak leh chhiar thiamlote zirtir tur hian Full Time Worker 273- tlanchhuah anni tawh bawk a ni. Anni zirtirna tur khian zirna hmanraw hrang hrang Rs 17.39 lakhs hman a nihthu tarlan a ni bawk. Mamit District- School hrang hranga thutthleng leh dawhkan mamawh leh Green Board mamawhna School- 170 hnenah thutthleng leh dawhkan 843 leisak anni a, hemi atan a senso hi Rs 29.505 lakhs niin, Green Board 503 lei nan Rs.25.15 lakhs hman a ni bawk.

Vawiin a First Responder Vehicle, Health Department-hnena hlante hi Hero Motocorp Motor Cycle siam niin Xtreme 200R leh a bik tak a sak damlo muttheihna dah a ni a, Heng FRV te hi thingtlang hmun kilkhawrah te awlsam taka damlo phurh kual zung zung nan leh damdawiin panpui nan a tangkai hle dawn a ni.

Vawiin Video Conference- hmanga Central Prabhari Officer leh REC Ltd leh Hero Motocorps Ltd hotute nena inkawmhona Programme- hi  Dr.Lalrozama IAS, DC Mamit- chuan kaihruaiin Department- hrang hrang aiawh leh khawtlang hruaitute bakah NGO- te an tel a ni.