No.6614/2020-2021

Lawngtlai, Sahmulphah thla ni 20, 2020: Vawiin hi 'khawvel pum huap naupangte ni' (universal children's day) a ni a, COVID-19 hri leng avangin kum dang angin a lawmna hun hman theih ni lo mah se, Lawngtlai District Child Protection Unit (DCPU) chuan hemi ni pual hian Lawngtlai Covid Care Centre (CCC)-a enkawl mek COVID-19 hri kai naupangte thilpek pein, an hnuaia naupang enkawlna hmun (child care institution) tinah naupangte nen a lawmna an buatsaih bawk.

Universal Children's Day 2020 puala Lawngtlai CCC-a naupangte tana thilpek hi Lawngtlai DCPU leh CWC (Child Welfare Committee) Lawngtlai tang kawpin pek a ni a. Hmawmsawm chi hrang hrang, thei chi hrang hrang leh intihfaina hmanrua - kut-bual-hlo (hand sanitiser), hmai-hrukpuan (face towel), ha nawhna (toothbrush), ha hlo (toothpaste) leh dettol sahbawn te chu naupang 13 tan ip hrang theuhvah a chi kima khungin an hming kimin pek an ni a. Naupangte ai awhin District Hospital Lawngtlai-a District Medical Superintendent Dr Zothanpari Chhakchhuak chuan a lo dawng a ni.

Lawngtlai DCPU hnuaia CCI zawng zawng - Lairam Motherless Home, Lairam Child Adoption Centre leh Lawngtlai Observation Home-ah te pawh naupang leh staff te'n Universal Children's Day pual hian hun hlimawm tak an hmang bawk. Tun dinhmunah Lairam Motherless Home-ah naupang 16, Lairam Child Adoption Centre-ah naupang 3 leh Lawngtlai Observation Home-ah naupang 1 an awm mek a ni.

Universal children's day hi kum 1954 khan a tum khat nan United Kingdom-ah hman a ni a. Naupangte'n an dikna chanvo leh hamthatna an chan theih nana an puala ni serh niin, kum tin November ni 20-ah hman thin a ni a. Ram hrang hrangin naupangte ni hi nei hrang thluah mah se, November ni 20 hi khawvel pum huap naupangte ni atana hman a ni ta zel a ni.