No.6613/2020-2021

Dated Serchhip, the 20th November, 2020:    Vawiin hian District Child Protection Unit, Serchhip chuan khawvel puma naupang te Dikna leh chanvo humhimna leh naupangte kawng tinreng a hma an sawn theihna tur leh venhim an nih theihna atana Ni bik ‘Children’s Day leh World Day for Prevention of Child Abuse’ an hmang kawp.

Covid-19 avangin kum dang anga programme lian tham leh naupangte intihhlimna erawh buatsaih theih a ni lova, District huam chhunga Children’s Home pahnih – Zoar Urban Deprived Children’s Home leh Unity Orphanage Home a naupangte tan hun hman a ni a, District Child Protection Unit, Serchhip thawktuten an hman pui a ni. 

Naupangte tana an ni bik pual hian mitin in ngaihtuahna seng thar in, kan tu leh fa, naupang te tan kan theihtawp chhuah thar theuh turin leh a tul anih chuan mithiamte pawh rawn hrehlo turin mipuite an sawm a. Khua leh tui tha kan nih theih nan naupangte enkawlna tha pek hi mitin ten kan mawhphurhna a ni tih hria a, tu leh fa te nen inpawhna tha tak nei a chhungkaw hlim tak in din zel tura tan la turin District Child Protection Unit, Serchhip chuan mipuite thawhpuiah an sawm a ni.

He hun hmanna Zoar Urban Deprived Children’s Home ah hian naupang mipa 5 leh hmeichhia 6 an awm mek a. Unity Orphanage Home ah hian naupang mipa 5 leh hmeichhia 2 an awm mek a ni.