2835/2022-2023
Mamit 28th November, 2022 : Er.H.Lalzirliana, MLA, Vice Chairman, Road & Infrastructure Development Board, Mizoram chuan vawiin khan St.Francis of Assisi High School, Mamit-ah Parents Day leh Bethany Society Platinum Jubilee khuallian niin a hmanpui.

Khuallian chuan thu sawiin Parents Day bakah Bethany Society-te Kum 75 tlin lawmna-a khuallian a ni thei chu lawmawm a tih thu a sawi a. MLA anih hma HPCL-a athawhlai atangin Mamit khawtlang hmasawnna thlentu tur an ni tih a hriat avangin St.Francis School tan theihtawp a chhuah thin thu a sawi a. St. Francis School te'n an record siam tawh chu ropui a tih thu sawiin zirtirtu leh zirlaite chungah lawmthu a sawi a. Tlawng thlang lam chu zirna kawngah theihtawpa tan kan lak a tul thu sawiin MCS emaw State Service-a inziak tling kan awm hleithei lo te chu school leh zirtirtute mawhphurh ringawt ni lovin, nu leh pate mawhphurhna a ni tel tih hre turin a chah a, kan fate chu kan theihna zawng zawnga support turin a chah bawk.

MLA chuan rilruin a ngam loh chuan engmah kan ngam ngailo, thei ang tlata inngaite chuan an thei mai thin tiin zirlaite chu chona nasa zawk nei turin a fuih a. Kan theihtawp kan chhuah a, tih tak takna nen thahnemngai taka kan bei anih chuan kan rinphak baka sangah kan awm thei a ni a ti. Pathianin ama anpuia duhtaka a siam, keimahni ang reng reng khawvela awm lo kan nih angin mahni inngaihhniamna nei lovin mi bik kan ni tih inhre turin kalkhawmte a chah bawk.

Pu Laldingliana, DEO, Mamit pawhin St.Francis of Assisi School chuan Mamit khawtlang hming vawi tam tak a lo titha tawh thin a. A enkawltu Sister te bakah zirtirtute lawmthu hrilhin School hlawhtling tak ni zel turin duhsakna a hlan.

Sister Sylvia, Principal, St. Francis of Assisi High School chuan kalkhawm zawng zawngte chungah lawmthu sawiin nu leh pate fuihna thu tha tak a sawi a. Pu Philip Rosiamliana, School Managing Committee Member hnen atangin thusawi ngaihthlak a ni bawk.

Mamit bialtu MLA hian St.Francis of Assisi High School tan hian Water Cooler leh Ball a pe a ni.

He hunah hian zirlai naupangte hnen atangin zai leh lam chi hrang hrang bakah zirtir nei tha Drama hmuhnawm tak tak thlirho a ni a. Programme hlimawm tak hmanho a ni.