2836/2022-2023
Aizawl the 28th November 2022 : Vawin atang khan Mizoram State Museum, Art & Culture Department chuan Museum Week an hmang tan a. He Museum Week hi December ni 2 thleng awh tur niin, he hun chhung hian mipuiten man chawi lovin Museum an tlawh thei dawn a ni.

Museum Week hawngtu Art & Culture Department Director Pu R. Hmingthanzuala chuan Museum chu hnam rohlu kan neih te zing a mi a nih thu a sawi a. Museum chu kan nihna min hmuhfiahtir thintu a ni, a ti a. Khawvel hmasawnna thang mekah hian kan nihna dik tak hmufiah turin hnunglam kan hawi let a tul fo thu leh Mizo mipuite chu hmasawn tura ke kan pen rualin kan nihna kan hriat chian zel nan Museum ngaipawimawh zel turin a fuih a ni.

Museum Week hawnna inkhawm hi Pi P.C. Zosangpuii, Museum Curator-in a kaihruai a. Week hawnna inkhawmah hian Modern HSS, Aizawl zirtirtu leh zirlai ten an hmanpui a ni. Mizoram State Museum bakah District Art & Culture Department Museum, Lunglei-ah Museum Week hi hman ve nghal a ni bawk. Museum Week hawnna inkhawmah hian Constitution Day hman nghal niin Preamble chhiar rualin hun hman nghal a ni.

District Education Office, Aizawl te nen tang dunin Aizawl khawpui chhunga school thlan chhuah bik 10 ten Museum an tlawh hun tur ruahman a ni bawk. State Museum-ah hian objects 3911 neiin chung zinga 723 chu  Showcase 100-ah an phochhuak mek a; kumin January atanga November thlengin Museum tlawhtu mi 8563 an awm tawh a, heng zing a mi 72 hi ram pawn lam atanga lo kal an ni a, VIP 6 in an tlawh bawk.