2837/2022-2023
Champhai, the 28th November, 2022: Sawrkar hmalakna kaltlanga December ni 1, 2022 atanga AMC Area leh District Headquarters zawng zawnga eirawngbawlna gas mahni kawtkaia chah thlen theihna, LPG Online Refill Booking & Home Delivery kalpui tur bawhzuina kalzelah Champhai Town Area chhunga LPS Home Delivery kalpui dan tur chungchang relin vawiin chawhnu dar 2 khan District Bawrhsap, Pu James Lalrinchhana hovin I&PR Conference Hall-ah inrawnkhawmna neih a ni.

Pu James Lalrinchhana chuan Sawrkar hmalakna hmanga kawtkaia gas chah thlen theihna kalpui a ni tur chu lawmawm tiin, LPG Home Delivery kalpui tur chu thil thar anih avangin chhawr tangkai thei tura ngaihven a tul thu a sawi a. Inzirtirna nena bultan a tul thu leh zaidawh leh infinchhuah chung zela hmalak a tul thu sawiin, insiamrem ngaihna laite zirchiang chunga hmasawnna thlen ngei tum a ni a ti a. Mipuite tana rawngbawlna pawimawh tak anih avangin tha taka kalpui turin thawhhona tha neih a tul dawn thu a sawi bawk.

DCSO Champhai Pu C.C. Sakhawliana chuan IOCL inkaihhruainate zawm chungin Sawrkarin mipuite mamawhna phuhruk nan LPS Home Delivery kalpui tura hma a lak thu sawiin, hei hian hun leh tha senna tam tak a pumpelh tir thei dawn a ni, a ti a. Hrechiang duh tan zawhfiah zel theih a nih thu a sawi a. Adhaar card leh ration thlunzawm kawnga tanlak zel a tul thu pawh sawiin, thlunzawm lo te paih zel anih tawh dawn thu a sawi a. District chhunga Fair Price Shop 75 te tihchangtlung tura hmalak chhoh mek zel anih thu pawh sawiin, Consumer-te dikna leh chanvote a sawifiah nghal bawk.

He hunah hian Pu Lalhmingsanga, Manager Mizofed i/c LPG Champhai chuan online hmanga Gas chah dan tura hmalakna leh chah dante a sawifiah a. Home Delivery atan Gas man bakah Rs. 70/- aia tam lo sen a ngaih dawn thu a sawi a. Champhai Town Area ah Consumer Gas la thin 14,900 vel an awm thu a tarlang a. Address tih felfai angaih dawn thu a sawi bawk.

Thukhawm chuan Sawrkar thupek bawhzuiin Champhai Town Area bakah MIZOFED Gas huamchin Tuipui khuaahte LPG Home Delivery kalpui nise a ti a. Gas Distributor-te chu zawm vek tura tih an ni a; buaipui tulte buaipui tur leh inkaihhruainate zawma mipuite zirtirna pe thin tura tih an ni a. December ni 1 atangin mipui huap registration hawn a, pilot project atan veng pahnih Venglai leh Keifangtlangte thlan an ni a, VC leh Gas Distributor lamte inrawntlang chunga inzirtirna kalpui pah zel nise tih a ni bawk.
He hunah hian Champhai Town Area chhunga VC te, Consumers Association, Champhai leh NGO hotute an tel a ni.

LPG Online Refill Booking & Home Delivery ni 1 December 2022 atanga hman turah Consumer-te tana hriattur pawimawh hrang hrangte:
1. Hmang turte tana in register dan tur (First time user - One time Registration)
a) 7718955555 hi mahni duhdana save phawt tur a ni. He number hi call tur a ni a, a rawn sawi angin in register tur a ni.
b) SMS hmanga register duh tan: (16 digits Cons. ID) Space (last 4 digits of Aadhaar No.) 7718955555
c) Gas Book duh chuan: SMS in REFILL 7718955555 tih thawn tur.

2. Miss call hmanga LPG Refill Book dan tur: 8454955555 hi mahni duhdana Save phawt tur.
? Gas book duh hunah Miss call tawp tur.
? Whatsapp kaltlanga tih dan tur: 7588888824 Save tur. REFILL tih hi 7588888824 ah thawn mai tur.

3. Play-Store atangin IndianOil ONE app download tur a ni a, registration tih hnuah awlsam takin Gas Refill booking leh thil dangte tih theih a ni.

4. IOCL portal cx.indianoil.in ah in register a, awlsam takin Book theih ani. cx.indianoil.in/webcenter/portal/LPG/pages_bookyourcylinder

5. Kan chenna address, phone number leh tul dangte a danglam tawh chuan siam that zel tur a ni. KYC a fel loh chuan Gas Agent-ah kalin awlsam takin tih theih a ni.

6. Phone number hi LPG connection tih laia Phone number kha hman tur a ni. Phone number emaw, e-mail thlak duh tana link (OTP nen tan kawp a ngai ang) chu cx.indianoil.in/webcenter/portal/LPG/pages_profile360

7. Gas man hi a duh tan pek lawk theih a ni a, Delivery Boy-in a rawn dah hunah tualchhung delivery charge Rs 70/- aia tam lo pek belh tur ni.

8. Subsidy luh dan check theihna link leh complaint awlsam taka siam theihna chu
cx.indianoil.in/EPICIOCL/faces/GrievanceMainPage.jspx a ni.

9. Dan ang taka Online Refill Booking tih hián langtlang taka thil tihna transparency a keng tel a, buk dik leh him tha, subsidy luh kawngah kori a tu hle bawk a ni.

10. Home Delivery kalpui tur hi sorkar Notification No.B.12013/4/2022-FCS&CA dated 01.11.2022 leh IOC - Marketing Discipline Guideline 2022 (MDG 2022) in a sawi anga
kalpui tum a ni.

11. MDG 2022 in a sawi angin Consumer hnena Gas pekchhuah tur reng reng a tling tha leh him ngei chauh a ni tur a ni. Gas bur ruak hi 14.8 Kg (a burah a inziak) leh a Gas tak 14.2 Kg = 29 Kg vel a ni ang. Delivery Boy-in address dik takah va be chiangin a dah ang a, a tul zawng zawng a check fel thlap ang a, Gas card-ah ziak lutin Cash Memo a pe chhuak bawk ang. Get cylinder checked for weight and leakage at the time of delivery tih chuang Cash memo a pe thin ang. Ref: MDG 2022 Chapter 1 (c), (d), (e), (f), (g), (h), (i),(l), 1.6 (ii).