No.7685/2020-2021 

Vawiin khan West Phaileng-ah BSF buatsaih Maitri Cycle Rally chu Dr. Lalrozama, IAS, Mamit District Bawrhsap chuan khuallian niin a vailiam.

Khuallian chuan BSF-te tha taka an duty thin avangin kan ramri a mipuite kan him a ni tiin BSF-te chungah lawmthu a sawi a. Kan pi leh pute'n ram min lo sahsak tawh chu tha taka enkawl a, ralmuanna hnuaia kan thenawm ram, abik takin Bangladesh nena thian tha leh inngeih taka awm reng tur leh thawkho zel turin a chah a. Bangladesh nena thenawm tha tak kan nih theih nana he Maitri Cycle rally buatsaih a ni chu lawmawm a tih thu sawiin an kal zelna turah duhsakna a hlan nghal a ni.

He hunah hian Pu H. Lalramliana, SDO (C), West Phaileng chuan Cyclist-te lawmna thu sawiin Shri L. Hoalai, 90th Bn 2ic pawhin programme-a telte chunga lawmthusawina a nei bawk.

Maitri Cycle Rally hi Bangabandhu Sheik Mujibur Rahman piancham puala neih niin India leh Bangladesh inkarah ram leh ram inthianthatna a awm theih nana buatsaih a ni a. He Rally hi 10th January, 2021 khan BOP Panitar, West Bengal atanga neih tan niin State 6 paltlang anih hnuah BOP Silkore, Mizoram-ah 17th March, 2021 khian tih tawp a ni dawn a. Maitri Cycle Rally thui zawng hi KM 4097 niin Rally-ah hian BSF sipai tanglai mi 17-te an tel a ni.

He hunah hian 90th BN BSF te'n Cultural Programme an neih bakah DC hian BSF-te ralthuam phochhuah chu a en nghal bawk.

Vawiin Rally hi West Phaileng khawtlang hruaitute bakah DIPRO Mamit-in a telpui a ni.