No.7684/2020-2021 

Ministry of Home Affairs, Government of India in Kangmei laka himna inzirtirna hapta hman dan tur a rawn chhawpchhuah te chu vawiin khan Chief Secretary's Conference Hall-ah Pi Sangchhin Chinzah, Secretary, SW & TA  kaihruaina hnuaiah enho a ni.

Meeting-ah hian Pu C.Lalthanmawia, Director, Fire & Emergency Service(F & ES) chuan MHA duhdan anga F&ES in  Fire Service Week 2021 hman dantur a chhawp chhuah te a sawifiah a. He rawtna ang hian Department hrang hrang te chu mawhphurhna pek an ni.

Kum danga tih thin angin kuminah pawh kangmei laka fimkhurna inzirtirna hun atan, Fire Service Week  2021 chu April 14 leh 20 inkarah neih a ni leh dawn a.  Kuminah chuan "Kangmei chhuah thulhah Kangthelhna Hmanrua nena lo inralrin lawk hi kan himna a ni", tih thupui hmanga inzirtirna kalpui a ni dawn a ni. 

Kangmei laka himna inzirtirna hapta hi Central Sawrkar duhdan angin April thla laihawlah hman tura ruahmanna nimahsela Mizoram bikah chuan March thlatir atangin khua a ro tawh avangin kangmei chhuah a hlauhawm tawh a. Hei vang hian Fire Service Week  2021 hman dan tura rela thukhawm  sawrkar committee chuan mitin te chu March thlatir atangin Kangmei chhuak thei lakah fimkhur vek turin a chah nghal a. Chanchinbumite leh Social Media lama ziakmi te pawh Kangmei laka fimkhurna inzirtir kawngah theihtawp chhuah turin a sawm nghal bawk a ni.