No.421/2021-2022

Mamit 6th May, 2021 : Vawiin khan Dr. Lalrozama, IAS District Bawrhsap chuan State dang atanga Mizoram rawn lutte Covid-19 an kai leh kailoh test-na hmun Kanhmun Screening Point leh Assam leh Tripura atanga Mizoram luhna hmunte a tlawh.

Dr. Lalrozama chuan Covid-19 hri nasa taka a darh mek zel avangin Kanhmun Screening Point-a duty-te chu chheltak leh fimkhur taka duty turin a chah a. Kanhmun Screening Point-a Power backup an mamawh thu District Bawrhsap hnenah duty-te hian an lo thlen a. Assam lam atanga Mizoram luhna Medili-a Police duty-te pawh kawm nghalin tun dinhmunah engmah harsatna an neih loh thu District Bawrhsap hi an hrilh a ni.

Kanhmun Screening Point-ah hian Emergency thil a awm a nih loh chuan chawhma dar 10 atanga chawhnu dar 3:00 thleng Medical duty-in dah niin hemi zulzui hian Medili leh Damcherra Gate pawh kaltlang phal a ni. Nikum July 2020 atanga kumin May 2021 thleng khan mi 10878 Screening tih tawh an ni a. Mi 8913 RAgT test tawh niin RAgT atanga Positive hmuhchhuah tawh hi mi 23 an awm tawh a ni.

Kanhmun Screening Point-ah hian Covid-19 Positive hmuhchhuahte Covid Care Centre (CCC)-a thawn chhoh hma-a an lo awm lailawkna tur Isolation Room leh tuldanga Medical-te hman atan hian Rs 90,000/- (singkua) District Bawrhsap hian a hlan nghal a ni. Tunah hian Kanhmun Screening Point-ah hian Medical Officer pahnih leh Lab Technician 2, Health Worker 2, Data Entry Operator 2 leh Covid Helper mi 2 an vaiin mi 10 an awm mek a ni.

District Bawrhsap hian Medical Duty, ramri-a gate duty Police-te leh Kanhmun VLTF te thingpui inna tur a hlan nghal bawk a ni.

Dr. Lalrozama hi SDO (C) Kawrthah Pu Paul Rokima, DIPRO, Mamit leh Kanhmun khawtlang hruaitute'n an tawiawm a ni.