Mamit DC Pi Lalbiaksangi chuan vawiin khan Mamit MJA member te a pisaah kawmin thingpui a inpui.
Pi Lalbiaksangi chuan MJA te nen a district hmasawnna atana thawhhona tha tak an neih a beisei thu a sawi a. Mamit district chu district dangin buaina an neih ve loh tam tak khawih tur a awm avang leh hnam chi hrang hrang inremna khawihpawi thei thil thleng tam tak a awm avangin thuthar thehdarh kawngah pawh rilru fim tak pu chunga thehdarh turin MJA member te a sawm a ni.
DC chuan DC office hmalak mekna te sawilangin Indo-Bangla Border Fencing buaipuina tur sum an hmuh tawh thu leh he hna in a khawih tur khawtlang tana a tangkai thei ang bera hman dan tur ngaihtuah zel anih thu a sawi a. Mamit - Phaizau kawng fur ruahin a tihchhiat pawh a zualpui thawm thatna atan Disaster Management and Rehabilitation hnuaia Natural Calamities atang Rs.36.87 lacs hmuh a nih thu leh hna thawh tan mek a nih thu a sawi lang bawk.
He inkawmna a tel ve Pu Malsawmtluanga, Election Officer hnen atangin Mamit District chhunga voter awm zat leh Digitization of cable T.V chungchang inhrilhhriatna neih a ni.MJA Mamit President Pu R. Lalmuanpuia chuan MJA kalphung sawiin, DC te nen khawtlang hmasawnna atana thawhhona tha an neih a beisei thu a sawi a. DC chu District Jail hawn thuai a nih theih nan leh Tlawng lei (Bairabi Kai) hnathawh mek chak zawka kalpui a nih theih nana hmalak pui tura sawmin, khawtlang harsatna a hmun ngei tlawh thin tur leh khawtlang tana rotling siamsak turin a ngen bawk.
Vawiin inkawm honaah hian NLUP dawngtute hmalakna endik kawnga tan lak dan tur tepawh sawiho a ni bawk.“Inkawm naah hian IPRO leh SDC te an tel bawk.
