No.2185/2021-2022
Aizawl 10th September, 2021 : Vawiin khan Dr. Lalrozama, IAS, DC Mamit, Khargeswar Pegu, Karimganj DC leh Rohan Kumar Jha, Hailakandi DC te'n Video Conferencing hmangin Mizoram leh Assam Sorkar State Level Meeting-in a phut angin District pathum DC te chuan ramri avanga inhuatna paih bo a, boruak tha a awm zel theih nan leh dan hnuaiah remna leh muanna a awm theih nan te, District pathuma mipuite chu inmamawhtawn kan nih angin ralmuang taka inkalpawhna a awm theihna tur chungchang sawiho niin lungrual taka pawmtlan a ni.

Meeting-ah hian DC pathumte chuan ramri leh a chhehvelah harsatna a awm loh nan theihtawpchhuaha hmalak nise an ti a. Ramri-a buaina a awm palh pawha a punlun zel loh nan tlang takin Information inhrilhhriattawn thin nise tih a ni. State Border Issue chu District Level thuneitute rel fel theih a nih loh avangin tuna kan dinhmun chinah hian tumah intibuaitawn lova, inzahtawn tlang taka khawsaho turin meeting-ah hian rel a ni bawk.

Meeting-ah hian State Level Meeting-in thlatina Meeting awm tura a tih angin DC pathumte hian boruak tha a awm zel nan thlatin Meeting ni bik leh hun bik siamin ruat fel nise, online platform hrang hrang hman tangkai nise tih a ni bawk.

Mamit DC hi Vineet Kumar, IPS, SP Mamit leh Paul Rokima, DIPRO Mamit te'n an tawiawm a. Hailakandi DC hi Gaurav Upadhyay, IPS, SP Hailakandi chuan a tawiawm bawk.