4910/2025-2026   

Dated Aizawl, 18^th March 2026: Nimin Thawhlehni khan Irrigation and Water Resources leh Fisheries Department Secretary Er. Lalrothanga leh a thawhpuite - Er. K. Hamlet, IWRD Chief Engineer te, IWRD official-te leh Fisheries Department official-te chuan Mamit huam chhunga IWRD leh Fisheries Department hmalakna kal mek leh hmachhawpte an tlawh a. Mamit khawtlang hruaituten an tawiawm bawk.

Tuidai multipurpose Project-a tuikhuahna hmunhma an tlawhnaah hian Secretary Er. Lalrothanga chuan he project hlawhtlin nana hmalaknate a sawi a, Mamit khawtlang tana a tangkai dan tur te, khualzinte tana hmun nuam tak ruahman tel tum a nih thute sawiin ram tana ro tling din tum a nih thu a sawi a. He Tuidai Dam hi meter 18 a sanga khuah tur niin a dil zau zawng tur hi Hectare18 vel a ni a, khuah zawh a nih hunah chuan huan hectare 700 vel chawm theiin, khaw mipuite tui tlan atan pawh a tangkai hle dawn a ni a ti bawk.

Hemi ni vek hian Darlakah Leilet neitute leh Sangha khawitute nen inkawm hona hun hman a ni bawk a, he hunah hian leilet neitute leh sangha khawituten an harsatna ber tui chungchang pawh sawi ho niin an harsatna sut kian a nih theih nan sawrkar-in chak taka hma a lak mek thute sawi a ni bawk. Darlak lui khuahna tur hmun remchang ruahman tawh chu a hmunah en nghal a ni bawk a, a khaw mite nen tangkai taka hman a nih theih nan ruahmanna siam ni se an ti a. Zan lamah Zawlnuam khawtlang hruaitu, zau hruaitute leh Sangha khawitu te nen inkawmna neih leh niin sangha tin siamna hmun pawh tlawh a ni bawk.

Hei bakah hian Fisheries Department hmun hmate leh IWRD hmalakna te tlawh a ni bawk a, farmer-te harsatna hrang hrangte chinfel dan turte sawi ho niin Serlui B tuikhuah atanga Kawlphetha siam tawhna tui lo luang chhuak pawh tangkai taka hman chhunzawm a nih theihna turin ruahmanna siam a ni bawk.