1753/2026-2027 

Dated Mamit the 12th of August,2026:Vawiin khan Chhim Veng YMA Hall, Mamit-ah District Treasury Office,Mamit bul tumin Family Pension Surrender chungchanga hriattur pawimawh inhrilhhriatna - 'Sensitization of Voluntary Surrender of Pension Payment Order' puala hun hman niin Pu Suvigya S Chandra, District Bawrhsap chu Khual Lian a ni a,Pi Jenny Thanhlupuii, Treasury Officer,Mamit District chuan hun a kaihruai.

District Bawrhsap chuan pension la te chuan dik taka dan anga lak hi kan mawhphurna a ni a, Mizote chuan rinawmna kan ngaihhlut angin rinawm taka dan anga pension la turin a chah. Sawrkar hnathawk te pawhin verification leh documents fel taka lo en chu kan mawhphurna a ni a, langtlang taka hna thawk tur leh harsatna leh zawhna kan neih chuan he program a resource person lo kalte chu zawtfiah turin a chah bawk.

Pi Jenny Thanhlupuii chuan he sensitisation programme hi Sawrkar hmalakna pawimawh tak a nih thusawiin ram siamthatna kailawn a ni a ti a, he hmalakna tih hlawhtlin a nih chuan Sawrkar sum sen vaibelchhe tam tak chu a tla hniam dawn a, kan ram hmasawnna kawnga rahbi pawimawh tak a ni a ti. Pi Jenny chuan he programme ti hlawhtling tur chuan NGO hruaitu, VC, Kohhran leh Sawrkar hnathawk te kan tanrual a ngai a, harsatna an neih te chu District Treasury Office a zawh fiah theih reng a nih thu a sawi.

Vawiin hunah hian Pu Zodingliana, Accounts Officer chuan DDO/ pension dealing te hriattur pawimawh sawi zauna a nei a, chawhnu session-ah Resource Person Pu Vanlalhruaia, Audit & Accounts Officer, Chief Controller of Accounts Office leh Sensitozation Team- 9 te chuan sawi zauna neiin zawhna leh chhanna hun hman a ni bawk. Pu R. Ramngaihsanga, Asst Accounts Officer chuan lawmthu sawiin hun a khar a ni.

Vawiin hunah hian Mamit chhunga Drawing and Disbursing Officer (DDO) te, khawtlang hruaitu VC te, NGO hruaitute, Kohhran hruaitute, MJA leh pensioner hruaitute bakah Sawrkar hnathawk sawm bik te an tel a ni.