Vawiin khan DC Conference Hall, Mamit-ah Dr Lalrozama, District Bawrhsap kaihruainain Mamit District chu Aspirational a nihna anga a dinhmun zirchianna United Nations International Children's Emergency Fund, (UNICEF) State Sawrkar aiawh leh District lama thuneitute nen neih a ni.

Meeting kaihruaitu Dr Lalrozama chuan Mamit District-in Aspirational District kan nih anga hmalakna a kalpui tawh dan leh hmachhawp hrang hrangte a tarlang a. General Election lamah kan buai tlan deuh avangin hmalakna duh anga chaka kalpui theih loh lai awm mahse a kaihhnawih Department hrang hrang kaltlanga hmasawnna hna erawh thawh reng a nih thu a sawi. Zirna leh hriselna kawngah theihtawpa tan lak a ni a. Mamit District chu hnam hrang hrang cheng kan nih avangin hridanna lak kawnga ngaihpawimawh dan a in an tawk loh avangte leh inkalpawhna kawng duh anga a that lohna avang te-in duh anga hmalak a harsat thu a sawi a. Mamit District dinhmun a taka hre tura rawn tlawhtu UNICEF leh State aiawhte chungah lawmthu a sawi a ni.

Dr Lalmuanawma, Jongte, Senior Medical Officer chuan Mamit District dinhmun hrang hrangte chipchiar takin a lem nen a tarlang bawk.

Dr Asish Dadwal, Health Specialist, UNICEF chuan International leh Mizoramte Maternal Health leh Child Health a kan dinhmun tlangpui tarlangin, tan lakna tur hrang hrangte a tarlang tel bawk a ni.

Dr Lily Chhakchhuak, State Programme Officer chuan Reproductive Child Health (RCH) a Mizoram dinhmun tlangpui leh hemi kawnga Central Sawrkar kaltlanga hmalakna hrang hrangte a tarlang bawk.

Pu R. Lalmuankima, SRC, UNICEF chuan Mamit District chu Aspirational District a nihna anga tehfung hrang hrang kaltlanga endik an nihna point-te kumin April to July thleng dinhmun a lem nen tarlang bawkin kumin July thla thleng khan Damdawi In-a nau nei hi 73.04% niin In lama nau nei Home Deliveries hi 14.89% a ni bawk. Mamit District chu a tlangpuia tehin an dinhmun hi chhe lutuk a ni lova, amaherawh chu khawilai Section emaw-a tlakhniamna chuan All India ranking-ah a pawh thlak theih thin avangin inthlahdah lova, tan lak a tul thu a sawi bawk.

Mamit District hmasawnna tur atana rawtna hrang hrangte State Level, District leh UNICEF lam atang sawi hona neih zui ni bawkin District Hospital, Mamit chu tlawhzui nghal a ni.