“Transport Department in tun aia nasa zawkin mipui tan hnathawh kan tum" – TJ Lalnuntluanga, Transport Minister

Vawiin khan Transport Minister Pu TJ Lalnuntluanga hovin Transport Department officer ten Transport Directorate Conference Hall-ah an thukhawm a, he hunah hian district hrang hrang atanga Transport Department dinhmun report niin Department-in hma a sawn zel dan tur te an sawiho a ni.

He hunah hian Transport Minister chuan department officer te fuihna thu sawiin Transport department kaltlangin nasa lehzualin mipuite tan hna an thawk dawn a ni a ti a. Transport department chuan ram mipui hmakhua leh an hamthatna tur ngaihtuahin sum leh pai lama a hlawk leh hlawk loh lam pawh thluk lutuk lovin mipui rawng an bawl chhunzawm zel dawn a ni a ti a. MST bus service hian a tum ber chu mipuite tana veivahna tlawm leh him a ni tiin private sumdawng motor tlan duh lohna hmun leh khua thleng pawhin an tlan zel a, passenger tlem leh tam lamah buai lovin hunbi ang thlap thlapin an tlan thin a ni a ti. Minister chuan Transport Department hi mi tam takin sum hloh department anga an sawi fo hi an hnathawh dik tak an hriat chian tawk loh vang a ni a ti a, Sawrkarin mipuite tan, a bikin cancer veite, mitdel leh pianphunga rualbanlote leh HIV+ te tan a thlawna chuan theihna turin ruahmanna a siam sak a, hmeichhia kum 60 chin chunglam tan Mizoram chhungah a thlawna an chuan theihna tur leh mim tupawh kum 65 chin chunglam tan 50% fare concession siam sak te pawh kan la kalpui reng a ni a ti a. Transport Department hma chhawp neih thar zingah tui kawng “Inland Water Transport” ngaihpawimawh a nih thu sawiin he hi tihhlawhtlin a nih hunah chuan kan lui dungte lawng kal theihna a ni ang a, nasa takin inkalpawh kawnga harsatna kan tawh te sutkian a ni ang a ti.

Minister chuan tuna Transport department in khualzin phur Bus service lai 36 an neih mek te chu a hlui deuh tawh avangin Bus thar leh changkang zawka thlak turin hma lak mek a ni a ti a. Khawvel thang zelin a ken tel chu lirthei pung zel hi a ni a, Motor Vehicle Wing pawhin lirthei enkawlna dan hrang hrang te tha takin an kalpui thei leh sawrkar sum bawma kumtin revenue an chhunglut thei reng chu thil lawmawm tak ani tiin kum 2018-2019 chhunga lirthei atanga chhiah an hmuh chu Rs. Nuaih 4223.38 a nih thu a sawi. Minister chuan department chhunga thawktu indaihlohna phuhruk dan tur ngaihtuah mek anih thu sawiin, indaihlo chung chung pawha phunnawi lova thahnemngai taka an thawk leh sawrkar revenue tha hnem tak an la hmuchhuak zel thei chu lawmawm a tih thu sawiin ram leh mipui tan a ni tih hria a tan lak belh sauh sauh turin a chah a ni.

Transport department hian mipuite harsatna hrethiam takin chhiah pe thalo te pawh an phurrit tihzangkhai nan ngaihdamna hun (grace period) July leh August thla chhung hian an hawng a, chhiah ba ten he hun hi hmang tangkai turin Transport department hotute chuan an ngen a, ngahihdamna hun hawn anih atanga vawiin thlenga sum hmuh zat chu Rs. 44,073,978/- anih thu tarlangin kunim April thla atanga vawiin thleng hian Rs. 1,81,950,118/- sawrkarah an chhunglut tawh a ni.

Pu K.T. Beichho, Commissioner & Secretary, Transport department chuan vawiin hun hi a kaihruai a, District Transport Officer te leh Directorate aiawhten an hmalakna report an pe a ni.

Attachment

  • Loading attachment...