Vawiin khan DC Conference Hall, Mamit-ah Mamit District chu Aspirational District a nih angin line Department hrang hrangte hmalak tawhna leh hmasawnna te bakah tun dinhmuna an thlen chinte sawihona neih a ni a. Meeting hi Pu Vanlalngaihsaka, District Bawrhsap-in a kaihruai.

Meeting-ah hian Department hrang hrangte'n an hmalak tawhna tarlangin General Election avanga hmachhawp hrang hrang thuanawp pawh a pangngai anga chak zawka hmalak chhoh leh a nih dawn thu tarlan a ni a. Mamit District huam chhung Secondary School bikah Electrict eng pe vek tura tuk kan nihna chu P&E Department hmalaknain 100% pek an nih tawh thu tarlan a ni. Zirna In zawng zawngah hmeichhiate tana inthiarna bik siam, naupang  School kal lo (drop out) leh zirlaite quality bakah Teachers Pupil ratio dinhmun tha lo lutuk chu District dinhmun tichhetu a la nih thu tarlan a ni.

PHE Department hmalaknain inthiarna nei lo tan Individual Household Latrine (IHHL) sak nan Unit khat zelah Rs 7000/- hman a nih dawn thu tarlan a ni a. Rs 7000 bak Beneficiary te'n Contribution an tum ve tur erawh tam takin an thawh theih thin lohna chu an harsatna ber a nih thu Meeting-ah hian tarlan a ni.

Horticulture Department hmalaknain khaw thenkhatah chhungkaw tinte mamawh dan azirin an thlai chin tur thlai chi leh a tiak sem a nih thu tarlan a ni a. Tun dinhmunah a rah seng tur a la awm loh avangin hmasawnna hmuh mai tur a la awm loh thu tarlan a ni bawk.

Agriculture Department hmalaknain Agricultural khawl thenkhat chu lo neitute hnenah man tlawm zawka pek a nih thu tarlan a ni.

AH & Vety Department hmalaknain kan ran vulhte hrileng laka an him theih nan hri danna pek thin an nih thu tarlan a ni a. Hei bakah hian Artificial Insimination hmangin Bawng a chi tha a kah rai thin an nih thu tarlan a ni bawk.

Sericulture Department hmalaknain Silk  siamna tur Eri Cocoons lama kan intodelh nan khaw thenkhatah lo neitute Cluster hrang hrangah thenin huan vahtir an ni thu tarlan a ni a. Hei bakah hian Line Department hrang hrang atanga kalte'n an harsatna leh a sutkian dan tur an sawi ve bawk.

Vawiin Meeting-ah hian Aspiration District hnuaia Line Department hrang hrang aiawhte an tel tha hle a ni.