Vawiin khan DC Conference Hall, Mamit-ah Inner Line Permit (ILP) nei lova Mizorama hnam dang rawn lutte zawn chhuah kawngah uluk lehzuala hmalak dan tur chungchang ngaihtuaha thutkhawm a ni.

Tun hnaia kan thenawm State Assam-ah National Register of Citizens (NRC) Final list tihchhuah a nih hnuah hian mi tam tak chu he list-a tello an nih avangin Foreigner anga ngaih an ni a. Hei vang hian himna zawnga thenawm State dangah an luh ngei rin a nih avangin kan fimkhur lehzual nan he Meeting hi koh a nih thu District Bawrhsap chuan a sawi a. Khawtlang huapa kan tanrual a tul thu leh mipui hnenah a tam thei ang ber inhrilhhriatna neih a tul thu sawiin khawtlang hruaitute chu hemi kawnga thawhhopuiah hian a sawm nghal a ni.

ILP nei lo, Mizoram chhunga lo lut tur venna kawngah Pu Shashank Jaiswal, IPS, SP Mamit pawhin nasa zawka hma an lak mek thu sawiin Kanhmun Check Gate bikah phei chuan CCTV dah thar a nih thu a sawi.

NRC List-ah hian mihring Nuai 19 chuang hret an tel ve loh avang hian a tel ve lo-te hian Court hrang hrang an thu thlennaah an chak zawh loh chuan nakin lawkah man a, detention camp-a dah a, an rama thawnkir leh tur an nih avangin Mizoram chhungah pawh dan lova rawn lut hi tam tak awm thei tura ngaih a ni a. Chumi atana lo inralrin nan vawiin Meeting hi a pawimawh em em a. Heng a hnuaia mite hi lo inralrin nan ruahmanna siam a ni.

1. VC leh NGO tangdunin Mamit District chhunga khaw hrang hranga hnam dang awm zawng zawngte hming list chhuah vek tur a ni.

2. Khawtlang hruaitute hriatpuina tel lovin mahni in leh lo hnam dang tumah luahtir loh tur.

3. VC leh YMA Information Center atangin mipui hnenah Awareness a tam thei ber puan nise.

4. Police leh Khawtlang hruaitute tangkawpin mahni veng chhung theuh uluk taka vil a, hnam dang mikhual-te lo thlithlai thin nise tih a ni.

Vawiin Meeting-ah hian DIPRO Mamit, District Village Council Association hruaitute, Jt. VC Mamit Town hruaitute, MZP Headquarters Mamit bakah thutharthehdarhtute an tel a ni.