Vawiin khan D.C Conference Hall-ah District Bawrhsap hovin Mizoram Environment & Forest Consultative Forum (MEFCOF) hotute, Mamit District chhunga Sorkar Department hrang hrang hotute leh Tlawmngai pawl hrang hrang aiawhte ,Mamit District chhunga Village Level Forest & Environment Committee under NLUP din chungchang ngaihtuahin thutkhawm a ni.

Meeting kaihruaitu District Bawrhsap chuan Mamit District chhungah uar zawka ramngaw humhalhna kawngah tan lak leh zual a, MEFCOF duhdan anga District chhungah Zotheihuan din ngei tura hmalak tum a nih thu sawiin District chhung thingtlang lamah din tura hmalak hmasak phawt tura ruahmanna kalpui tum a nih thu leh hemi kawngah hian mipuite tanrualna lo chuan a hlawhtlinna hmuh tur a awm dawn loh thu a sawi a ni.

Meetingah hian MEFCOF Gen Hqrs President Pu V.L Bela chuan an pawl hmalakna leh hmachhawp hrang hrang bakah thil tum te tarlangin khaw lum zual zel tur ven nana ramngaw siam thar te, Tuihna humhalh te, Ramhnuaia Ramsa reng reng humhalh te, ramhmul damdawi leh thing leh hrui par chi phun uar sauh sauh te chu hmalakna langsar zual a nih thu sawiin, Zotheihuan hi Mizoram pumah 60 chuang din a nih tawh thu a tarlang.

MEFCOF Gen Hqrs President chuan Mizoram sorkar nena tawngkawp hma an lak thu leh Mizoram Sorkar pawhin NLUP Implementing Agency ah a dah ve thu a sawi a, Zotheihuan Coordination Committee hi khawtlang hruaitute intel khawm ten an din a ni a, MEFCOF chuan a tul anga enkawlpui leh venpuitu hna an thawk thin, zoram khua zawng zawngah Zotheihuan hi a tahtawla din tum a nih thu a sawi bawk.

Vawiin thutkhawmah hian Mamit District chhunga zotheihuan din na tura hmalakna tur hrang hrang sawiho a ni.