No.7373/2020-2021

Vawiin khan Dr. Lalrozama, IAS, Mamit District Bawrhsap hovin Nalzawl khua-ah Aspirational District Prigramme hnuaia Public Meeting and Awareness Campaign on Maternal and Child Health neih a ni a. Nalzawl khua-a Sorkar Department hrang hrang hmalakna leh hnathawhte a enfiah nghal bawk.

Nalzawl BNRGSK Hall-a Public Meeting-ah thu sawiin Mamit Bawrhsap chuan hriselna lama kan District chhunga khaw 11 hnufual bikte zingah Nalzawl khua chu a tel ve avanga tlawh an nih thu sawiin Anganwadi, Ante Natal Care, ASHA leh VC te'n nasa lehzuala tan an lak a ngaih thu a sawi a. Nu naupaite kan in-report that thin loh avangin kan District chu Health Sector-ah kan hniam phah thu sawiin naupai reng reng Anganwadi leh Sub Centre-ah in-report vat thin turin a chah.

Nu leh naute kan him chuan kan khawtlang Security system a tha tihna a ni tiin Immunization kalpui zelna-ah Vaccine kan fate a hun taka kan laktir thin a pawimawh a, chhungkaw pa ber pawhin kan fate'n hridanna an la ngei em tih ngaihven chu kan mawhphurhna anih thu sawiin nuin hah takin kan fate vaccine lain an hruai a, Vaccine lakna avanga kan fate an khua a lo sik palh pawhin pain an nupuite ngaihsak a, dawmkang tur leh tawiawm tha thin turin Nalzawl paho a fuih bawk.

Pu Ramtinchawma, Nalzawl VCP pawhin fur laia an khaw kawng tha lo-in khawtlangah harsatna a thlen thin thu sawiin DC tawiawmtu Officer-te pawhin an Department hmalakna kalpui mek chungchang an sawi ve bawk.

Mamit District Bawrhsap hian Nalzawl khua-a Sub Centre, Anganwadi Centre leh Zirna In tlawhin Anganwadi I-ah hian naupang 81 leh Anganwadi II-ah hian naupang 93 Enrollment an awm a, Health and Nutrition Day thlatin an hmang thin bawk. Fisheries Department hmalakna tlawhin Tuikhuah lian pakhat atangin Sangha Quintal 110 an man thu report ngaihthlak a ni a. Land Resources, Soil and Water Conservation Department hnuaia Beneficiaries te Rubber Plantation a thlirpui nghal bakah Agriculture Department hnuaia Beneficiaries FIG (Farmers Interest Group) te nen inkawmhona an nei bawk. DRDA Mamit hmalakna leh hnathawhte pawh a hmunah hian a tlawh bakah Nalzawl Health and Wellness Centre saklai mek a tlawh bawk a ni.

District Bawrhsap hi PD, DRDA, CMO, EE, PWD, DAO, DEO, District Officer, Soil Department bakah DFDO Mamit te'n an tawiawm a ni.