Tukin khan Govt Mamit High School-ah Pi Lalbiaksangi, District Bawrhsap chuan Discussion Forum te buatsaih Free Coaching Class chu a hawng.
Mamit District Bawrhsap chuan Discussion Forum te'n Coaching Class buatsaih nachang an hria chu lawmawm a tih thu sawiin Competitive exam hmachhawn tur chuan taihmakna leh tumruhna a pawimawh ber a. Tuna Competitive exam-ah chuan Subject hrang hrang rualkhai taka thiam a ngai a, Coaching Class kal tur thalaite chu taima tak leh tumruh taka zir a, hlawhtlinna chang ngei turin a chah.
Discussion Forum hi Mamit District tana zirna lama mi thahnemngaite din niin, Mamit District thalaite'n Competitive exam hrang hrang an hmachhawnna turah Subject hrang hrangah Free Coaching neihthin tura ruahman niin faculty, Mamita Officer leh zirtirtute'n thla 1 chhung atan zirtirna an pe dawn a ni. Coaching class hi Govt Mamit High School ah zing dar 6 atanga dar 7:30 inkarah period 1 neih thin tur niin Inrinniah period 3 neih thin tura ruahmanna siam a ni.
Programme hi Pu K. Vanlalnghaka, Associate Professor, GMC in kaihruaiin Discussion Forum member leh faculty atangin infuihna thu hrang hrang ngaihthlak a ni a, zawhna leh chhanna hun hman a ni bawk. Coaching Class kal tum mi 50 bawr velin registration ti tawhin naktuk atangin Coaching Class hi neih tan nghal tura ruahman a ni.
