Nimin khan State Guest House Conference Hall ah Social Welfare Secretary Pu P Lalchhuanga hovin "National Survey on Extent and Pattern of Substance Use in India" tih thupui hmangin inrawnkhawmna neih a ni.
National Survey on Extent and Pattern of Substance Use in India hi Ministry of Social Justice and Empowerment, Government of India kal tlangin National Drug Dependence Treatment Centre (NDDTC) leh All India Institute of Medical Sciences (AIIMS), New Delhi nena tangkawpin kalpuiin India ram State tin leh UT ah survey nei tura ruahmanna a siam a. He survey-in a tum ber chu ram pum huap leh state level-a ruihtheihthil hmangsualzawm zat chhiarna neih leh estimate siam te, India ram chhunga ruihhlo hmang sualten an nghei theihna tura hmalakna hrang hrang awm thei ngaihven leh tanpuina dawnna lama harsatna awm thei enfiah leh zirchian a ni.
Vantlang mipui mimir zingah ruihhlo an lo hmelhriat dan leh ruihlo hnathawh an hriatdan zirchian nan Mizoram leh Tripura-ah mi 16,000 ve ve kawm an ni dawn a. Interviewer hran bik ruaiin ruihhlo ti thinte an kawm ang a, an damdawi khawih thin leh an tih dan phung zawhfiah an ni ang. Hei bakah hian ruihhlo hmang thin, jail-a tang mek te, nawhchizuar leh zirlai ruihlo ti thinte zingah zirchianna kalpui tum a ni bawk.
He survey hi India ram hmun hrang hranga agency thlanchhuahten an thawk dawn a. Mizoram leh Tripura-ah chuan Social Defence & Rehabilitation Board, Social Welfare Welfare Department in he survey hi a kalpui ang. Mizoramah District pali - Aizawl, Lunglei, Champhai leh Kolasib; Tripura-ah hmun hnih - Tripura South leh Tripura West ah survey hi buatsaih a ni ang.
