No.5953/2020-2021  

Mamit 10th October, 2020 : Nimin lama Thinghlun khua-a Pu John Zolawma Thlam hal chungchang leh Pu Ben David-a Kuhva huan Assam lam mite'n an tihchhiatsak chungchanga thil thleng leh boruak zirchiang turin Dr.Lalrozama, IAS leh Pu Shashank Jaiswal, IPS, SP Mamit bakah District Officials dangte'n vawiin khan Thinghlun khua an tlawh.

Mamit District Bawrhsap chuan ramri buai chu State Sorkar pahnihin dawhkan kila sawiho-a chinfel theih anih laia hetianga Karimganj Administration hotute'n an mahni ngaihdan chauh ngaihtuaha Mizoram leh Assam inrina Thinghlun khua-a Thlam halsak leh Kuhva huan tihchhiatsak an ni chu pawi a tih thu leh a tawrhpui thu a sawi a. Dan lo anga Mizoram chhunga thil thleng chungchangah hian a tul anga hma la turin Karimganj Deputy Commissioner hnenah nimin tlai khan ziaka thlen nghal a nih thu a sawi bawk.

Pu Shashank Jaiswal, IPS, SP Mamit pawhin Thinghlun leh a chhehvel mipuite thlamuang taka awm tura chahin, a tul dan anga chak taka hmalak a nih dawn thu a sawi a. Mahni thu-a dan lo kengkawh ve ngawt lo tura mipuite chahin eng thil pawh thleng se, Police leh IR Duty-te hnenah Report pe zel thin turin a chah a ni.

Assam Forest hotute'n Mizoram chhunga Signboard nimina an tar hi lakthlak niin Kanhmun Police Station-ah seizure turin lak a ni a. Kanhmun OC hnenah FIR thehluh nghal niin Thlam an halna bulah hian 4th IR Platoon khat-te duty-na tur hnatlangin Puan In sak nghal a ni.

Dr. Lalrozama, Mamit District Bawrhsap hian Assam leh Mizoram inrina chungchang hi Ni 25th September, 2020 khan Karimganj, Deputy Commissioner hnenah ziakin a lo thlen tawh a ni.

Mamit District Bawrhsap hi SDO(C) Kawrthah, Addl. SP Mamit bakah khawtlang hruaitute'n an tawiawm a ni.