Vawiin khan Zamuang khua-a Rural Haat sak thar chu Pu Vanlalngaihsaka, Mamit District Bawrhsap chuan khuallian niin a hawng.

Khuallian Pu Vanlalngaihsaka chuan Hachhek tlangdunga pengthuam pawimawh tak Zamuang khuain NABARD sanction a Rural haat an lo nei ta chu lawmawm a tih thu sawiin, Hachhek tlangdung tan pawh a chhenfakawm anih a beisei thu a sawi. A hmunhma enin Zamuang khua chu Rural haat nei awm tak khua an nih thu sawiin tangkai taka an hman zui zel a beisei thu a sawi a ni.

Zamuang Rural Haat hawnna-a khualzahawm Mr. VR Nag. DGM, NABARD Mizoram regional Office Aizawl chuan NABARD hmalaknate sawiin thingtlang hmasawnna atana Bank-te nen an inthlunzawm dan te, Agriculture a thingtlang hmasawnna nasa zawk a thlen theih nana project an kalpui dan hrang hrangte a tarlang a. Hun lokal zel turah kut hnathawktute tan a hmalak zel an inhuam thu a sawi bawk.

Pu Immanuel Khawlhring, Treasurer, Rural Management Committee chuan Technical Report pein Rural Haat chu NABARD Sponsored a nih thu leh NABARD atang hian Rs. 997500/- Sanction a ni a.

VC-te thawhkhawm Rs.52500/- nen avaiin Rs 10,50000/- (Nuai sawm leh Singnga) senga sak puitlin a nih thu a tarlang. Rural Haat sak hna hi Ni 16.02.2018 atanga tan niin Ni 25.10.2018 khan sak zawh a ni a. A Building len zawng hi 70ft × 15ft a ni.

Vawiin Rural haat hawnnaah hian Pu C.Lalramsanga VCP Zamuang bakah Pu Saikhalha, Chairman Farmers Producers Organisation Zamuang te'n thu an sawi bawk.

Zamuang Rural Haat hawnna Programme hi Pu K. Lalnuntluanga, Chairman, Rural Haat Management Committee-in a kaihruai a ni.