Vawiin khan School Education Minister Pu Lalchhandama Ralte hovin  Secretariat Conference Hall, New Secretariat Complex-ah School Education Department leh SCERT-a Officer ten zirna chungchang ngaihtuahin meeting an nei.

He meeting-ah hian School bag policy chungchang te, School timing chungchang te, Samagra Shiksha Abhiyan chungchangte leh CCE chungchangte sawiho a ni a, School bag chungchangah chuan naupangin an ah rih zawng tur bituk a pelh loh nan NCERT-in a prescribed bak zirlai zirtir loh a tul thu te, Class I leh II ah Home work inpek loh a tul thu te sawi a ni a , naupang lian lam High School leh Higher Secondary School-ahte pawh school bag rih loh dan tur kawng zawn a tul thute sawi a ni.

School timing chungchangah chuan Primary School atanga Higher Secondary School ten tuna School timing hman meka harsatna an neihte sawi a ni a, school naupangte tana School tan hun hman tlan theih tur remchang zawk pawh sawiho a ni.

Samagra Shiksha Abhiyan-ah chuan Society pakhat hnuaia kalpui tur a nih avangin tunah hian buaipui mek a nih dante sawi a ni a, tun dinhmunah Ministry of Human Resource Development lam atanga Fund lokal a tlem avangin nikum lama PAB Approval te pawh tihpuitlin theih ala nih loh dante sawi a ni.

Continuous and Comprehensive Evaluation(CCE) chungchangah zirtirtu indaihlohna avangin CCE kalpui a harsat dan te, khawpui leh thingtlangah khairual taka kalpui theih a nih loh dante sawi a ni a, thingtlang lamah a bikin Primary School-ah phei chuan zirtirtu awmsain tha taka kalpui tura harsatna an tawh dante sawi a ni.

School Education Minister chuan zirna chungchangah a taka thawktute nen sawihona hun remchang an nei thei chu lawmawm a tih thu a sawi a, heng sawihona chi hrang hrang atang hian sorkarin thutlukna siamin hma a la zui dawn niin a sawi.

Vawiin meeting-ah hian School Education Commissioner & Secretary Pi Esther Lalruatkimi, School Education Director Pu K. Laldingliana, SCERT Director Pi Laldawngliani Chawngthu te , Secretariat leh Directorate-a officer te bakah Teacher Association hrang hrang aiawhte an tel a ni.