Vawiin khan Labour Employment & Industral Training (LE & IT) leh Central YMA buatsaih Mamit District chhunga Cement mistiri thlakhat chhung atana training neih chu zawhfel a ni. Kharna inkhawm Siamliana Hall, Mamit Charkawnah neih niin Pi Lalbiaksangi, District Bawrhsap Mamit chuan he hun hi khuallian niin a hmanpui.

Hemi pual inkhawm hi Pu Elley K.Rosanga, Secretary , Sub Hqrs YMA Mamit chuan kaihruaiin Pi Lalbiaksangi, District Bawrhsap chuan Mizo thalaite tana Cement Mistiri hna training buatsaih a ni chu a lawmawm takzet a ni a ti a, he hun buatsaihtu LE&IT leh Central YMA te chungah lawmthu a sawi. Mizo thalai tlangvalte tan eng hna pawh thawk ila taihmakna tel lo chuan hlawhtlinna a awm thei lova, tuna training chhuakte pawh mi hnuaia hna thawk tura inphahhniam a pawimawh hle dawn a ni a ti. Cement Work-ah hnam dang kan rawih thin avangin sum tam tak a luangral thin a, chu’ng ang harsatna tikiang tura mizo tlangval ngei maiin he hna kan thawk thei tur chu lawmawm a tih thu a sawi.

He hunah hian Pu Zatluanga Sailo, President Sub Hqrs YMA leh Instructor te’n thu an sawi a, Training chhunga tlawmngai ber thlanna neih niin lawman a tan Rs 1000/- pek a ni.

LE&IT, Central YMA ten an buatsaih Cement Mistiri hna hi Nov 2 atanga neih tan a ni a, training chhung hian practical atan Mamit Bazar venga Pa eisual avanga a chhungte’n an boralsan, Sub Hqrs YMA bultuma In an sak sak mek Miriami insak hna an thawk a ni.

Training-ah hian Sub Hqrs YMA huam chhung atangin Mizo tlangval 100 te’n Cement Mistiri an training a ni.