Vawiin khan Pi Lalbiaksangi District Bawrhsap, hovin Mamit District chhunga Kawngpui chhe zual lai thawmthat dan tur leh Bailey Bridge te dinhmun leh mipui tan a him leh him loh te thlirhovin Mamit District chhunga Sorkar Department te leh Tlawmngai Pawl hrang hrang aiawhte thukhawm.

Vawiin Meeting hian Mamit District mipui ten kan nitin mamawh kan chawk luhna ber leh Aizawl panna kawngpui NH 44A kawngpui laih mek vanga kawngpui awmsa, tihchhiat a nih avanga harsatna awmte thlirho a ni a, kawngpui sial mek avanga tuna kan zawh mek kawngpuite thawmtha turin Gayatri company te chu tih an ni. Company lam hian kawngpui cheithat hna hi a rang lama thawh an tum thu sawiin fur khawchhiat lai a nih vangin duh anga hna thawh theih a nih loh thu an sawi bawk. Hei bakah hian District chhung kawng sialhna kalmek KTZKT Road hna kal mek leh hemi avanga harsatna awmte sawi ho niin he kawng sialhna thawktu ABCI lamte chuan kawngpui thawmthat hna hi a theih anga thawh tum a nih thu leh thawmthat hna hi thawh mek a nih thu meetingah hian an tarlang bawk a ni. Heng bakah hian Mamit khawpui chhunga kawngpui chhe zual lai thawmthat dan tur sawi ho a ni bawk.

Mamit District chhunga Bailey Bridge hrang hrang leh Lei dawh hna kal mek te dinhmun thlirho na neih a ni a, District Bawrhsap Pi Lalbiaksangi chuan Kan District chhunga Bailey Bridge te a dawh kumte a rei deuh tawh avangin lirthei zawh tawk tur a District Bawrhsap in hriattirna a lo chhuah tawh chu mipui leh lirthei khaltute pawhin zawm zawm hram hram turin a ngen nawn a ni. Teirei Bailey Bridge Saikhawthlir bul a mi chu mithiamten an endik danin Lirthei Bungraw phur tan 50 quintal bak zawh ngam a ni tawh lova, hemi ah hian District Bawrhsap chuan vawiin hian lirthei zawh tawk turah Order a chhuah nghal a ni.

Pi Lalbiaksangi, District Bawrhsap chuan kawngpui sialhna thawh avangin kan district chhung kawngpui te a chhe zuala, hemi kawngah hian theihtawpa hmalak mek a nih thu sawiin a viltu department EE te chungah lawmthu a sawi a, nasa leh zuala kawngpui sialhna thawktute enzuia vil leh zual turin a chah bawk a ni.

Meeting-ah hian District chhunga PWD hotute, Sorkar Department hrang hrang aiawhte leh Tlawmngai Pawl hrang hrang aiawhte an tel tha hle a ni.