Vawiin khan Health Minister Pu Lal Thanzara chuan Hachhek Constituency Development Committee (HCDC) buatsaih Freshers’ Social chu Lal Thanhawla Auditorium-ah khuallian niin a hmanpui.
Pu Lal Thanzara chuan hlawhtlinna chabi chu thawhrimna a ni tiin college leh school level-a zirlai kai tharte taima turin a fuih a. Hlawhtlinna kawnga harsatna lo lang thinte hi hlawhtlinna kailawna rahka pakhat chauh a ni a, rim taka beia teirei peih apiang an hlawhtling thin, a ti. Minister chuan Mizo zingah UPSC a inziak tling thei mi an tlem tial tial a, state dang atanga lokal IAS leh IPS ten Mizoram sawrkara hna pawimawh an chelh tam telh telh dawn nia lang chu pawi tiin zirlaiten chonaah ngai se a duh thu a sawi a. State thenawm a miten sawrkar laipui office-ah te, hospital leh company lianah hna pawimawh an chelh fer fur laiin Mizo hmuh tur kan tlem ta em em hi inngaihtuah harh a ngai ta, a ti a. Mizoram tana malsawmna an nih theih nan tuna zirlai ni mek te hian ram pawnah an thiamna hmanga huaisen taka pen chhuak turin a fuih a ni.
PWD changtu Minister Pu Lal Thanzara chuan Mamit kawng chungchang sawi langin kawng laitu phai contractor-in midang hnenah a hna a hralh chhawnga, kawng siam hna rei tak a sukuk chu pawi a ti a. Sawrkarin theihtawp a chhuah a, chak zawka hna an thawh theih nan an nawr mek laiin dawhthei taka he bial mipuiten an nghak chu lawmthu a sawi a ni. Khedacherra-. Damcherra-Zamuang-Tuilutkawn (KDZKT) Road laih tan mek pawh bialtu MLA, Labour Minister Pu Lalrinmawia Ralte nen an vil reng thu leh Bairabi bul Tlawng lei dawh mek tui lianin a len chhiat pawh tui kam veleh shuttering siam nghal a nih tur thu a sawi bawk.
Khual zahawm Pi R.Lalnunthari, DEO, Mamit pawhin Hachhek bial mipuiten zirna kawngah nasa taka hma an sawn chu lawmawm a tih thu leh zirlai pass tharte a lawmpui thu a sawi a. Zirna bul tan mek fresher-te pawh thahnemngai taka lehkhazir turin a fuih a ni.
Pu Lal Thanzara leh Pi R.Lalnunthari te hian kumina High School Leaving Certificate, Higher Secondary School Leaving Certificate leh Under Graduate exam result chhuaka tithate hnenah lawmman an sem a ni
Freshers’ social hi HCDC Chairman Lalzawma Pachuau chuan kaihruaiin an General Secretary Lalvansanga Pautu chuan an pawl hmalakna a report a. An pawl Adviser Pu Lalrindika Ralte leh Vice Chairman Kanan Lalhlimawma te’n zirlaite fuihna thu an sawi a ni.
