Vawiin khan Finance Minister Pu Lalsawta chuan a bial, Aizawl East II huam chhunga Saron Veng leh Chhinga Veng te tlawhin MLA development fund hmanga veng chhung hmasawnna hna kalpui dan leh hmalakna tur pawimawh te a a enpui a. Heng veng pahniha khawtlang hruaitu te leh pawl hrang hrang te nen Chhinga Veng Community Hall-ah veng chhung mamawh leh harsatna te sawiin hmalakna tur pawimawh te an sawi ho a ni.

Khawtlang hruaitute nena an inkawmna ah Pu Lalsawtna chuan miretheite khai chhuahna tura Mizoram sorkarin NLUP a kalpui mek chuan hmasawnna tam tak a thlen tawh a. NLUP kalpui zel chungin tunah hian hmasawnna bung thar atan New Economic Development Policy chu kalpui tum leh mek a nih thu a sawi a. A bial chhunga khawtlang hruaitute leh pawl hrang hrang ten veng chhung hmasawnna tura tan an lakna chu lawmawm a tih thu sawiin veng chhung hmasawnna hna thawh nan MLA development fund anhmuh ang ang te chu hlawk tak leh tangkai takin an hmang a ni, a ti a. Tun hnaiah Chhinga Veng khawtlang hruaitu ten pawl hrang hrang te nen BPL list endik hna an thawh atangin BPL list chu mi 300 vel atanga 33 ah a tlahniam chu chhinchhiah tlak a tih thu a sawi.

Pu Lalsawta chuan Chhinga Venga Aizawl City Centre shopping mall sakna tur hmun te, Chhinga Veng leh Saron Veng inrinnaa tui luankawr leh culvert siam that ngai te, veng chhung inkalpawhna tura Bethani road siam tharna tur te leh Chhinga veng mawnga tui luankawr siam mek te a hmunah fangin a en a. MLA development fund nuai 21 hmangin Chhinga Veng Community hall tih changtlunna hna te, nuai 10 hmangin Local Council House sak chhunzawm hnate, nuai 3 hmangin Waiting Shed sak hna te thawh a lo ni tawh a. Heng bakah hian veng chhung kawng siam that hna leh hmasawnna hna dang te pawh MLA development fund hmangin thawh a lo ni tawh a ni.