No.2694/2020-2020

Ni 1.7.2020 khan Animal Husbandary & Veterinary Department atangin Dr. M. Zohmingthangi, Deputy Director(DI) leh Dr. Esther Lalzoliani, Veterinary Officer (DI) te chuan Vawk natna hlauhawm tak African Swine Fever, Assam, Arunachal Pradesh leh Myanmar a leng mekin Mizoram a lo luh ve loh nan Mamit District chhung ramri-a Village Level Task Force-te hnenah Awareness Campaign leh Risk Assesment an nei.

AH&Vety Department aiawhte hian Mamit District chhung ramri thenkhat Tuidam, Kawrthah, Rengdil, Zamuang, Zawlnuam, Bungthuam leh Kanhmun khua-a VLTF hruaitute hun hmangpuiin African Swine fever hi Vawk natna hlauhawm tak, a vei za a zain an thihpui theih, a venna leh enkawlna damdawi awmlo a nih thu leh Assam leh Arunachal Pradesh-ah pawh vawk singhnih chuangin an thihpui tawh thu an sawi a. He natna hi Vawk leh Sanghalin an kai thei a, Vawk leh Vawksa atanga eitur siam atang pawha kaidarh theih anih avangin mipuite fimkhur turin an chah a. Mamit DC Order dinglai angin Vawk, Vawksa leh Vawksa atanga thil siam hrang hrangte Mizorama lakluh khap tlat a nih thu sawiin Vawk hriin Mizoram a lo luh loh nan thuawih tlan a pawimawh thu an sawi a ni.

Heng Awareness Campaign an neihna khaw hrang hrangah hian VLTF-te kutah tanpuina pawisa pek theuh an ni a. Dr. Lalrozama, IAS, Mamit District Bawrhsap hnenah mipuite hriat tur pawimawh Banner an hlan bawk. Awareness campaign hi Mizorama border hrang hrangah kalpui mek niin Team dangin Champhai border an tlawh kual mek bawk a ni.

Mamit District chhunga Awareness Campaign neia rawn kalte hi Dr. R.L Tanpuii, District AH & Vety Officer, Mamit-in a tawiawm a ni.