Vawiin khan I&PR Conference Hall, Mamit-ah  Mamit District Launching Programme of Total Literacy Drive 2017 chu Pi Lalbiaksangi District Bawrhsap chuan khuallian niin a hawng. 

Pi Lalbiaksangi chuan Mamit District chu ziak leh chhiar thiam inzirtir tura tan lakna tur kawng hrang hrangte  sawiin mi chi hrang hrang leh hnam hrang hrang cheng kan nih avangin chhiarpui hnuhnung berah pawh kan hnufual bik thu a sawi a. District chhung khaw hrang hrangah May ni 1 atang hian beihpuithlak a nih dawn thu sawiin heng khaw hrang hrangah te hian Education Department bakah department hrang hrangte chu phungbawma sawmin, thingtlang kilkhawr zawkah te chuan kohhran rawngbawla awmte pawh thawhpui thiam turin a chah bawk a ni.  

Pu T.C Lalremsiama, CAEO, Adult Education Wing, Directorate of School Education /District Co-ordinator pawhin Mamit District chhunga ziak leh chhiar thiam kawnga kan dinhmun leh hmalakna tura khaw chhawpchhuahte a tarlang bawk. 

Mamit District chhungah hian kum 2011 chhiarpui hnuhnung berah chuan ziak leh chhiar thiamlo mipa 4023 leh hmeichhia 6655 an vaiin mi 10678 an awm a ni. 2014-2015 Departmental Survey-a a lan dan erawh chuan mipa 2474 leh hmeichhia 5228 an vaiin mi 7702 an awm mek thung a ni. kum 2015-16 chhung khan Total Literacy hmalakna in ziak leh chhiar thiam lote thiam tura zirtirna kalpui chhoh-ah mi 164 te chu ziak leh chhiar thiamtir an nih thu tarlan a ni bawk. 

 He hun hi Pi Lalnunthari, DEO Mamit chuan kaihruaiin  puitling ziak leh chhiar thiamlo Adult Education hmalakna hmanga thiamtate atangin thusawi ngaihthlak a ni a, an zirtirtute atangin hma an lak dan ngaihthlak a ni bawk. 

He hunah hian Mamit District chhunga zirtirtu thlanchhuah te, Mamit khawpui chhunga Head of Offices, Tlawmngai pawl hrang hrang atang te leh Nehru Yuhva Kendra (NYK) a tang te’n mi sawm bikte an tel a ni.