Mamit District Child Protection Committee chu an chairman Mamit DC Pi Lalbiaksangi hovin thu hrang hrang ngaihtuahin an thukhawm.

Vawiin thutkhawmnaah hian District Child Protection Officer Dr. Lalrinhlua’n April- September inkara District Child Protection Unit (DCPU) in case an khawih zat te a tarlang a. Naupang dan bawhchhia (Juvenile in conflict with law) case 27 (mipa 24, hmeichhia 4) neiin, naupang chhawmdawl ngai (child in need of care and protection) case 115 an nei a, heng zinga case 11 chu sexual abuse a ni a. Special Home-ah naupang 4 thawn niin, Shelter Home-ah naupang 12 dahluh an ni a. Protection of Children from Sexual Offences Act (POCSO) hman a nih atangin case 25 neih tawh a ni a. District chhunga naupang rethei zual lehkha zir na tur tumsak (sponsor) 81 an awm mek bawk.

November 14 a Children’s Day hman dan tur Committee chuan ngaihtuahin, he ni hi a theih anga huap zau a hman ni se tiin an rel a. Children’s Day hi Mamit khawchhunga hman tura duan niin, zing dar 6:00 ah khawchhunga school naupang zawng zawng tan marathon buatsaih a ni anga, chhunah Chhim Veng YMA Hall-ah Middle School tan thil pawimawh inzirtirna leh hun hlimawm tak buatsaih a ni dawn bawk a ni. Hei bakah hian thil pawimawh hrang hrang te sawiho a ni bawk.