3242/2022-2023
Mamit 13th January, 2023: Vawiin khan DC Conference Hall, Mamit-ah Mamit District Final Electoral Rolls, 2023 chu Pu Lalnunhlua, District Election Officer, Mamit chuan a tlangzarh.

District Election Officer chuan a hun taka Final Electoral Rolls tlangzarh a ni chu lawmawm a tih thu sawiin, a buaipuitu Election Officials-te chungah lawmthu a sawi a, inthlanna dik leh felfai a awm theih nan Electoral Rolls dik leh felfai tak neih chu thil pawimawh tak a nih thu a sawi bawk.

Pu Lalhmachhuana, Election Officer pawhin Final Electoral Rolls tlangzarh tak chungchang sawizauna a nei bawk.

Vawiin-a tlangzarh tak Final Electoral Rolls- a a lan danin Mamit District chhungah vote nei mi 68402 awmin mipa 34591 leh hmeichhia 33811 an ni. Draft Rolls tlangzarh tak nena danglamna hi -1.35% a ni. Mamit District chhungah Assembly Constituency Pathum 1-Hachhek, 2-Dampa leh 3-Mamit awmin Polling station 121 a awm mek a, 1-Hachhek A/C huamchhungah Zamuang Polling Station-ah Voters 1109 awmin a tam ber a, Sotapa Polling Station-ah Voters 132 awmin a tlem ber thung a ni. 2-Dampa A/C huam chhungah Silsury-I ah Voters 967 awmin a tam ber a, Zopui Polling Station-ah Voters 47 awmin a tlem ber a ni. 3-Mamit A/C huamchhungah Voters 1030 awmna Damparengpui polling station chu a tam ber a ni a, Tlangkhang Polling Station-ah Voters 122 awmin a tlem ber na a ni bawk.

Final Electoral Rolls, 2023 tlangzarh takah hian Tripura Bru Transit Camp-a Voter awm zawng zawng 8850 atangin Tripura State Sawrkar atanga thurawn angin Voters 3445 paih tawh niin tunah hian Voters 5405 an la awm mek a ni. Election Commission Of India (ECI) sawi angin Special Summary Revision of Photo Electoral Rolls, 2023 neih takah hian ni 01.01.2023-a kum tling thar bakah qualifying date dang - 01.04.20230, 01.07.2023 leh 01.10.2023-a kum 18 tling thar turte tan E/Roll-a inthun theihna tur remchang hawn ngal a ni a, qualifying date 01.01.2023 bak zawng khi chu a hun a thlen hma chuan dispose a ni dawn lova, online a dil te nen ERONet lamah entry lawk niin, a hun ruat thlen hma chu a process theih dawn rih lo a ni. Hun ruat a thlen huna dispose emaw process leh mai tura dah that rih a ni.

Final Electoral Rolls, 2023 tlangzarh tak hi Political Party aiawh BJP, MNF, INC leh ZPM te hnenah District Election Officer hian a hlan nghal a ni.

Vawiin Final Electoral Rolls, tlangzarhna hunah hian ERO, AERO, Political Party aiawhte bakah Election Officials te an tel a ni.