Mamit District a Sorkar laipui Scheme hrang hrang hnuaia hmalakna te endiktu tura duan Mamit District Level Vigilance & Monitoring Committee chu vawiin khan an chairman Pu C.L.Ruala, MP(LS) hovin DC Conference Hall,Mamit-ah an thukhawm.

Committee Chairman Pu C.L.Ruala chuan kalkhawmte kumthar chibai bukin,sawihona tha tak an neih a beisei thu a sawi a. Kangmei venna hapta a nih angin ram tikang lo tura tan la tur leh zirtirna uar turin kalkhawmte a hrilhin, neitu rilru pu a ramngaw duat turin a chah a, sorkar hnathawkte hmasawnna thlentu kan ni tih hria a taima taka thawk turin a fuih bawk.

Committee co-chairman Pu Ronald Sapa Tlau, MP(RS) pawhin ramngaw humhalh a tul thu sawiin, Mizoram chu mau ah a hausa a hei hi eizawnna tling thei turin sorkarin a ruahmanna a siam thu a sawi bawk.

Mamit District-ah kum kal mekah MGNREGS hnuaiah job card nei mi 20639 hnenah ni 34 inhlawhna siam a ni tawh a. IAY hnuaiah Rs.27 lack hmangin chhungkaw 36 te tan chenna In sak mek a ni a. IWMP hnuaiah Project kal lai mek 7 awmin hmalak mek a ni.

PMGSY hnuaiah W.Phaileng to Damparengpui Road 2.13km chu cell filled concrete pavement works siam zawh tawh niin, Lungphun - Kanghmun Road 8.31km chu zawhfel a ni tawh a. Lengpui- Hmunpui Road, Zawlnuam - Zawlpui Road, Bunghmun - Mualthuam Road leh Bunghmun - Thaidawr Road siam hnathawh mek a ni a. Mamit - Phaizau Road 1.97km chu siam tura ruahmanna siam mek a ni.

Swachh Bharat Mission hnuaiah Ek In (Toilet) neilo chhungkaw 114 te ek in sak sak an ni a, vantlang zunin leh bualin W.Phailengah 2 sak a ni a. Suarhliap-ah bawlhlawh bawm in tin ah 2 semin bawlhlawh sawngbawlna hmun siam a ni bawk.

National Social Assistance Programme hnuaiah kum 80 chunglam mi 399 te leh kum 60 chunglam mi 1678 te hnenah Tar pension pek an ni a, mi 331 hnenah Hmeithai tanpuina pek a ni.

National Health Mission hnuaiah mi 82463 huam niin, IMR chu 22 a ni a, MMR (Maternal Mortality Rate) 368 a ni.

Committee-ah hian Scheme hrang hrang te chu uluk leh chipchiar taka sawiho a ni a. Sorkar laipui scheme hnuaiah Direct Benefit Transfer hmanga beneficiary te bank accountah thun zel a ngaih tawh avangin Mamit District khaw 5-ah tal Bank hawn belh nise tiin thuneitu sang zawkah thlen ni se an ti a ni.

Vawiin meeting-ah hian SSA leh RMSA hnuaia hmalakna te sawiho a ni bawk.

Meetingah hian Pu Lalrobiaka, MLA pawh telin, sorkar laipui hnuaia scheme hrang hrang khawihtu sorkar department official te leh NGO te an tel a ni.