“Worm Free Children are Healthy Children “ tih thupui hmanga RBSK ( Rashtrya Bal Swastrya Karyakram ), RKSK ( Rashtrya Kishor Swartrya Karyakrams ) leh NHM ( National Health Mission ) Mizoram Health Department te buaisaih in vawiin khan Health Minister Pu Lal Thanzara hovin Observation of National De-Worming Day hman ani.Health Departmenta Officer te leh zirlai naupang thahnem takin he hun hi an hmanpui.

India Sorkar ruahmanin Mipui te himna tur leh hrisel nan National De-Worming Day( NDD) Ram pum huapa Rulhut dona ni hman anih dan sawifiah in khuallian Pu Lal Thanzara chuan India rama awm kan nih avangin he programme hian min hrut ve a,Health Department in hetianga hma an lo la hi lawmawm a tih thu sawiin ram hmasawnna hrang hrang heng Kawngpui tha, Electric power, Electronics hmanraw hrang hrang leh thildang ah te hmasawn mah ila,a mi chengte kan hrisel loh chuan awmzia a nei thei dawn lova,chuvangin kan hriselna tur hi kan ngaihpawimawh a tul ani ati.

Mi tamtakin kan ngaihpawimawh em em loh Rulhut hian natna hrang hrang Thisen tlakchham na (anaemia) ,chaw ei chak lohna,taksa chau leh hlauhthawnna te,pumna,luak leh kawthalo leh a dangte a thlen theih thu Health Minister chuan sawiin ram hrisel leh naupang hrisel kan neih theihna turin hriselna atana mithiamten an sawi anga rulhut damdawi vawiina sem mek Albendazole ei a pawimawh thu leh rulhut pai avangin naupang than a thu in an rilru leh thluak ngaihtuahna a tihhniam theih thu a sawi a,naupang kum 2 atanga kum 19 inkar te chu vawiina Health Deparment in an sem mek rulhut damdawi Albendazole chu ei ngei ngei turin a chah a ni.

Health Department hmalakna te khuallian chuan sawiin Aizawl Civil Hospital atangin Falkawn ah insuan phei nimahse Civil Hospital chu hlamchhiah anih dawn chuanglova,natna a zir leh enkawl tur chin erawh chu bithliah tum zel ani a, chutihlaiin refertu Doctor te pawh an fimkhur a tul ani a ti a. Doctor te indaihlo hle mahse siam rem zel tura hmalak anih dan leh khawii hmunah pawh insawn hreh lo turin Doctor te chu ngenin,hmun kilkhawr berah pawh min mamawhtu an awm ani tih hria a,midangte tana malsawmna ni tura in pe zo tur in a ngen nghal bawk.

Observation of National De-Worming Day hman hmasak ber inkhawm vawiin programme Dr.K Ropari,Principal Director H & FW Deptt in a kaihruai ah hian Dr K. Lalbiakzuala,Mission Director,NHM, H&FW Department chuan India sorkar hian hriselna chawisang tura hma a lak dan sawiin hriselna ngaih pawimawh loh a vanga awm mai mai hian thihna a thlen theih thu leh chu chu pumpelha venhim theih anih thu te,rulhut chi hrang hrang te chu kan bul hnai mai lei leh tui atanga kai theih vek a ni a, chuvangchuan rulhut damdawi pawh hi zavaia ei loh chuan inkai awlsam tak anih avangin he programme hman chhung vawiin atanga tun thla ni 15 chhung ngeia ei vek turin mitin a ngen nghal.

Vawiinah hian naupang kum 1-19 inkar mi 386000 vel te chu a thlawnin sawrkarin rulhut hlo a pe a. Sawrkar leh private School hrang hrang leh Anganwadi Centre hrang hrangah heng naupangte hi rulhut hlo pek an ni a, rokhawlhna eng emaw vanga vawiin a rulhut hlo ei lo te chu February ni 15, 2016 (Mop up Day) ah pek an ni ang. Naupang te hriselna tur leh vawiin National Deworming Day Mizoram puma hlawhtling taka hman a nih theih nan Health & Family Welfare Department te, Social Welfare Department te leh Department of School Education te chuan theih tawp chhuahin hma an la tlang a ni.