Ni 2 chhung awh, Governors’ Conference chu President of India Pu Pranab Mukherjee chuan Rashtrapati Bhavan, New Delhi ah Februabry 8 leh a tuk February 9 ah khan a lo thleng a. Mizoram Governor Lt.Gen(Rtd) Nirbhay Sharma pawh in he conference ah hian thusawiin Mizoram mamawh te a tarlang.

Governors’ Conference vawi 47-na ah hian state Governor 23, UT Lt.Governor 2, Vice President Hamid Ansari, Prime Minister Narendra Modi, Cabinet Minister te, NITI Aayog Vice Chairman Arvind Panagariya leh National Security Advisor Ajit Doval te an tel a.

He conference pawimawh tak ah hian ram chhung venhimna chungchang, Fiarfiak leh helpawl kaihhnawih chungchang, thalai te tana skill development kaltlanga hnathawhtur siam sak, Zirna, National Flagship Schemes hrang hrang leh smart cities bakah sawrkar hmalakna pawimawh tak tak thlir hona te leh kalpui chhunzawm dan tur te ngaihtuah a ni.

Nimin ah khan conference pawimawh tak chu neih a ni a; he hunah hian Mizoram aiawh tu, Governor Lt.Gen(Rtd.) Nirbhay Sharma chuan Mizoram chu state ralmuang ber a nih thu sawiin state tih hmasawnna tur tanpuina pekchhuah chungchangah pawh duhsak phu a nih thu a tarlang . BRU Refugee chungchanga state in harsatna a tawh te thlen in ramri venhimna kawngah tun aia nasa zawk a central sawrkar in a puih a ngai a ni a ti. Skill Development ah Mizo thalai te an hlawhtlin theih a rinawm thu sawiin Prime Minister Narendra Modi-a hmathlir “Make in India” hnuaiah Horticulture atana hmun duhthusam, Mizoram chu ngaihven ni se a duh thu a sawi a. Act East Policiy hlawhtlin nan Mizoram ah Digital connectivity, railway connectivity, leh kawngpui tha zawk te siam hmasak a ngaih thu mi pawimawh te hma ah hian a tarlang bawk a ni. Mizoram tana thil pawmawh hrang hrang a thlen zingah KMMTTP kawngpui laih mek leh Bairabi relkawng thawh mek te chak zawka kalpui a tul thu pawh tarlang in lirnghin thut hlauhawmna hmuna awm Mizoram leh hmarchhak bial chhung chu ‘Smart City Mission’ ah pawh uluk zual pui an mamawh a ti a ni.