Vawiin khan Mamit Ditrict Level Vigilance and Monitoring Committee Meeting chu DRDA Conference Hall, Mamit ah an Chairman Pu C.L. Ruala, M.P.(Lok Sabha) hovin an thukhawm.

He meeting ah hian Chairman, Pu C.L. Ruala, M.P.(Lok Sabha) chuan member kalte kumthar chibai bukin Mamit District hi District hnufual kan nih avangin officer fel tak tak kan neih te pawh hian theihtawp chhuah a hma kan lak tlan a pawimawh a ni a ti a. He District chawikanna tur hian keimahni theuh hi kan pawimawh a ni tiin taima taka District hmasawnna atana hna thawhpuiah offier te a sawm bawk.

He meeting-ah hian Pu C. Lalpeksanga, Project Director, DRDA, Mamit chuan kum 2011-12 chhunga sum hmuh dan leh hman dan tlangpui a report a, MGNREGS hnuaiah chhungkaw 18257 te hnenah ni 79 inhlawhna pek anih tawh thu te, Central sawrkar atanga sum cheng nuai 3558.98 lai mai hmuh anih tawh thute, Sawrkar laipuiin In 302 sa thei tura Mamit District a beisei laiin IAY Insak tanpuina hmanga chhungkaw 432 te In sak sak anih tawh thu te report ah chuan tarlan a ni. Central sawrkar in Third Instalment a pek leh tak avangin mipuiten kumin chhunga ni 100 an thawh tlin ngei theih nan ni 21 inhlawhna siamsak leh thuai tum anih thu Report ah chuan tarlan a ni bawk.

Pu C. Lalpeksanga PD, DRDA chuan Mizoram sawrkar duhdan anga Job Card endik hna a tah tawla thawh anih thu leh Job Card lem zawng chhuak tura DEGSU Staff te West Phaileng Block lama an thang mek thu te sawiin sawrkar kum thar atang chuan Material Component 40% atanga 20% a tihhniam anih thu a sawi bawk.

He District Level Committee ah hian Rural Development Department hnuaia Programme hrang hrang MGNREGS, IAY SGSY, DRDA Admin, IWDP, IWMP, PMGSY, NRLMP, TSC, NSAP leh NLUP hnuaia Mamit District chhung a hmalakna hrang hrangte chipchiar takin sawiho a niin kum 2011-12 chhunga sum hmanna te chu tha tawk hle in Committee chuan a hria a, hetih lai hian State sawrkarin sum indaih lohna avanga a tum ve tur (Matching Share) a pek tlai avanga sum dawn tur a buai phah thin chu Committee chuan pawi a ti a. Chairman chuan hnathawh thenkhatte meeting leh hma a a hmun ngei a en theih nise a duh thu a sawi bawk.

He District Level Vigilance & Monitoring Committee ah hian Co-Chairman Pu Lalhmingliana MP(Rajya Sabha), Pu John Rotluangliana Deputy Speaker leh Pu Lalrobiaka, MLA Chairman ZIDCO te pawhin thu an sawi bawk.

He meeting-ah hian BDO leh PIA ten scheme hrang hranga an hmalakte report chipchiar takin an pe a ni.